Big day 安排 － 出門午飯外影回門
1. 酒店出門：如果男女家距離遠，可以考慮租男家附近酒店房出門，或者索性男女家都租在同一間酒店。不過大前題當然要雙方家長同意。
我自己就租返晚宴酒店出門，就可以慳返時間同人手在搬物資方面。同埋已經避開女家去男家過海的塞車位，距離又縮短一半。
2. 男家化妝安排：男家早上如果只有奶奶需要化妝，可以考慮在附近另外安排。除了慳返mua的士錢，主要可以不需要奶奶超早就化好妝等新人入門(因為mua多數完成女家化妝就直接往男家)。
如果唔打算理啲男家親友Ad hoc 化妝要求，記得交代mua唔好理，話你唔會俾錢。否則你人又唔在現場，真係好難控制。
3. 泊車安排：事前問定泊車安排，例如停車位置，可以免費泊幾耐(其實多數屋苑見你大日子都會斟情俾你免費泊)
4. 車花：車花一定要縛實啲，好多時會飛走
5. 等齊人先落車：新人花車會先開車出發，多數會早過攝影師同兄弟姊妹車到男家，記得要等埋先落車，方便攝影師影相
6. 租車等候費：記得問事前清楚租車公司要唔要收等候費用，多數逐程租要，全日則免。問下有無封頂。Big day overrun 好常見，無封頂可能要俾多好多。記得準備多啲現金俾兄弟姊妹找OT數。
另外
預備定散紙俾隧道費停車場，司機未必有得找。隧道費一覽（
按我）旅遊巴過海3條隧道的費用都真係有距離，所以租車公司建議都係行返紅隧。
7. 全程跟車：租車中間就算有幾程吉車都最好安排有人跟車，因為司機未必方便聽電話，咁起碼有人跟進位置、安排泊車或者處理突發狀況（唔好講笑，Big day touchwood 撞車都唔Surprise，真係試過）
順手分享埋，運輸署特別交通安排(
按我)，事先睇定有無封路就唔怕無準備。話說我當日除了中環Formula E, 還有不少封路，睇住同日b2b group 封路提醒出完一個又一個，真係咪話唔擔心。
8. 分好坐邊架車：如果兄弟揸車就安排埋邊個坐邊架車同夾定上落車位置。順便一提，借人車幫手做司機多數會封返兩封利是，一封俾車，一封俾人。
9. 人等車好過車等人：趕rundown又人多，就早啲起行去上車地點等Van／大巴到，車到就即上車即走
10. 入門安排：留意家長對出入門要求，吉時，拜神等儀式。入門父母要先回避，由新郎請父母出來。
11. 男家敬茶：敬茶部分同出門（
詳情按此）差不多，事先煲水沖茶，安排人手洗杯，幫忙戴金器。其實如果敬茶唔需要戴金器，進度會快好多。
12. 分頭行事：入門多數緊接午飯，如果不需要全部兄弟姊妹幫手，可以分頭行事。部分人收拾物資準備下場，或者搵位食午飯，或者買外賣
13. 影完相先入門：如果在男家附近安排咗影兄弟姊妹大合照，可以在男家樓下影咗先上男家，可以慳啲時間，唔使上完去又落返樓下影相。
14. 午飯安排：午飯如果已經訂位，事前講定地址，booking#之類俾兄弟姊妹知（見
兄弟姊妹會）。
15. 午飯安排：在酒樓午飯的話，叫兄弟姊妹先去攞位點菜。如果已經預訂埋餸菜就叫酒樓早啲開始上菜。最好叫老爺奶奶先到酒樓，新人繼續換衫收拾，免得無主人家在座，大家唔好意思食先。
事緣我當日老爺奶奶叫咗套餐，主人家個枱又等埋我哋先上菜，等極都未有得食，食完前菜冷盤我哋兩個已經夠鐘出發回門，食得兩啖麵（我哋午飯係有龍蝦伊麵架！無得食真係慘慘豬。我認我真係好為食）。仲要溝通不良，兄弟姊妹已經叫咗點心，佢哋食飽先上龍蝦伊麵，結果食剩超多餸。
16. 午飯安排：記得留返食飯位俾攝影師、Mua等等Vendors同幫手的工作人員。唔包食飯都起碼留返個放飯位俾佢哋。
17. 外影要Plan B：週末外影地點可能勁多人，同時留意平日同週末交通狀況有所不同。諗定plan B 或者取消外影，晚宴行禮或者地點影多啲相。
因為我自己無安排外影，所以都唔多貼士俾大家，唔好意思
18. 即日回門係其中一個當日的最佳決定。最初收到父母話要即日回門的要求係非常不願意，因為前往女家交通好麻煩，要在分秒必爭的big day預留超多時間。但是事後回顧覺得好好。即日回門等如加咗個休息位，big day無論新人、家長同兄弟姊妹都真係需要休息下。如果早啲識咁諗，就唔使為咗回門安排躁底。回門豬就可以事先搵人拎定返屋企先，唔使特登又去燒臘檔。我就揀咗在女家午飯酒樓訂埋豬，一定順路。
寫完18個point，又要停一停。希望幫到大家啦！
－－－－－－－－－－－－－－－－－－－－－－－－－－－－－－－－－－－－－－－－－－－－－
Check list 控系列
選擇困難系列
１２３文字錄
