水水聯婚 - Prewedding 杜拜篇

話說早在大釘求婚之前，我們已經和朋友們約好在年尾的杜拜之旅 (其實我們還有到阿布扎比) 。既然機票酒店都俾咗錢，大釘就話不如順便影埋相，當海外Pre-wedding。難得大釘提出，小虫就即刻上網做功課，格下價。為免影響行程，我們不會另外安排婚紗化妝，只鎖定當地攝影師。可惜識影相的朋友沒有join這趟旅行，否則連攝影師都不用找，拍膊頭影一下便算。

事前Research

其實單單到杜拜旅遊，已有點兒冷門，何況影prewedding，大家多數都只是在杜拜轉機才順道遊覽一兩天。因而，網上介紹甚少，我很快便Shortlist 了兩位攝影師，並問他們拿Rate card。價錢比想像中便宜，可能因為攝影師單人匹馬，慳返人工。兩位攝影師都好好，雖然只以電郵聯絡，但係回覆很快，亦有詳細回答我的問題。

杜拜影 pre-wedding的人不多，反而較多影engagement photos，但不論哪一種網上的reference 都有限。

後來攝影師講，原來engagement photos 只能找女攝影師拍，而且有人的照片都不能公開，所以多數只係見到啲首飾場地setup之類，好似攝影師blog 呢啲相咁

既然資訊有限，我們就膽粗粗揀咗平啲嘅攝影師幫手。

決定景點

杜拜的Pre-wedding 景點可以參考:
http://wedding.esdlife.com/articles/wedding-photo-os/20140918_pre_wedding_spots_in_dubai/

杜拜的婚紗照最多人取景的是沙漠，但路途遙遠，不單要額外加錢，而且花費不少時間在交通上。所以我們直接放棄了。查詢的時候Miracle garden 翻新後重新開放的日期還未公布，我們便選了在沙灘拍帆船酒店和拍杜拜塔。

行前準備

比起搵香港pre-wedding揀選攝影師的時候已經search 定資料，對於這個海外pw我們超hae。決定日期地點攝影師就當安排好，連確實時間也沒有，因為Marina (我們的攝影師) 說要按當天的日出/天氣決定。

不過我們都有少量準備：

1. 衣服
Bf 提議過情侶tee，我就嫌唔襯外國靚景。重點係自己身形唔係typical 嘅香港mini 女仔，坊間啲tee 通常都著得我好樣衰，一係就鬆身似用黎當睡衣嘅camp tee，一係就細件到著起咇曬啲肥膏變肥婆，所以俾我reject咗。

自己無咩fashion sense，所以便服揀恤衫同連身裙襯返色，杜拜呢次一次粉藍，之後香港嗰一次粉紅。

最後買咗呢條通花背心裙，好鐘意通花款呀！這條裙已經在網店售完了！所以放自己嗰條嘅相。

2. 花球
朋友淘寶買多了，我義不容辭接收。因為要hand carry 這個絲花球，過海關的時候被查問。當然，X光機睇唔到啫，一開袋拎實物出黎就知係假貨，可以放行。

3. 字母木牌
唔少朋友都應該有淘寶訂造字母牌，我都唔執輸！淘寶店本身已經有好多Sample。

(圖片取自店家)

一向優柔寡斷的我拖拖拉拉了好一段時間都沒有處理好，差一點便來不及出發前收貨！我低估了起稿修改製造運送來來回回整個過程的時間，最後為了趕及pw而張就比較不理想的設計。

另外，木牌我訂了白色，但婚紗多半也是白色。影香港pw時，因為會同婚紗黐底而出鏡率很低，後悔無訂造其他顏色。

話就話從簡，但衫加埋鞋，加埋小道具同化妝品都唔少。

晴天霹靂

雖然一直以email聯絡但Marina 很responsive所以就算無傾過電話/見過面都好放心。反而到達當地就有少少擔心，因為我send 咗當地聯絡給她一直都沒有回覆。直到在前一日再打電話給她才知道原來她早前不在杜拜，虛驚一場。順道約好拍攝時間和會面地點。

前一日我們自己亦實地考察過，係咪好似畫一樣咁靚呢！

當日早上5時我已起床梳洗化妝，但是當天色漸光的時候就發現唔對路，因為窗外係咁架！

能見度都唔知有無十米，點解一個乾到水都無滴的地方會有霧?! 呢個時候Marina 就聯絡我們話實在太大霧，等啲霧散咗再影。我們唯有一路hae 食早餐一路等(前一日我們仲連釘熱多士揸醬都怕嘥時間，買咗杯麵做早餐)。

一直等到10點多還是煙霧瀰漫，只好改到下午2點，希望大霧會隨太陽高照而散去，亦因此同行的兩個朋友行了個大運，被我們急召回來再轉戰old market。

前往 old market 的路上，霧霞有稍稍退卻。後來我們放棄了杜拜塔的景點，而直接到看到帆船酒店的沙灘拍照。可惜大霧雖散，整個天空還是一片灰濛，只勉強看到帆船輪廓。Marina苦笑，唔建議我們拍pre-wedding，嘥錢。但她好好人，話難得我哋一場黎到又等咗成日，佢唔收錢幫我哋影幾張couple shooting，留個紀念咁。

她仲帶我們去旁邊的朱美拉市集，因為方向不同，算是比較清楚見到帆船酒店。但因為屬於私人地方，嚴禁沒有申請的商業拍攝，我們被實焦先生驅趕左好幾次，想偷影幾張都唔得。

免費成品

就係咁我哋無啦啦有一輯free pre-wedding，都叫做因禍得福丫。天氣嘅嘢真係無得搞，諗住杜拜唔落雨唔使怕天氣唔好點知都係影唔到。Marina 話間唔中杜拜都會有霧不過多數太陽出黎就散，我們響杜拜幾日都好大霧，直到last day 先叫做見返下藍天。大霧真係好愛我們。

Marina 好快send 返相俾我，都有50張架！不過就唔係張張都用得，因為無乜擺pose 唔似香港影相俾咁多指示，我對鐘頭極不敏感，成日變成奇怪角度。同埋外地影相真係唔興道具，有花球都好夠。

怕醜，所以淨係放張背面相算啦。唉…真係好濛查查，我嘅帆船酒店呀！

依家就要諗下可以點用輯相勒。

水水聯婚: Checklist 控系列: Pre-wedding 揀相貼士(下篇)

中篇之後好似遺忘咗要埋尾，黎到呢Part 大部分都係其他人講過嘅。

呢啲寫字文，唔知有幾多人睇呢…另外就係呢度隨時打手多過新娘，阻人搵食猶如殺人父母。樣樣都打爛砂盤問又好似未合作就先搞到vendor 有bad feeling，我自己都希望被人信任啦！

但係作為新人可以做嘅真係唔多，無論準備幾多都可能會中伏，實在太多寫唔完、對付唔到嘅中伏位。事前睇過曬package 先揀，百貨應百客，無端端埋單要兩倍甚至三倍嘅價錢，真係好無辜。當然有人話無人迫你加，但係我買Package 唔包被sell架喎，被人hard sell 除咗消費緊我嘅時間簡直仲係精神虐待。

廢話講完，返番黎Checklist 文。未睇上篇同中篇嘅朋友，可以去爬一爬文先。

睇完相，揀好相，先到戲肉，今篇講究竟有咩加錢位。

22. 揀相後加錢位：油畫相框／UV 膜／相簿

以上3種都是耳熟能詳的加錢項目，不逐一寫了

油畫框 Package 包的款唔合意，可以收貨後自己拎出去再造算。留意Package係包油畫Size的相，定真係油畫。如果只係相紙，即係又要準備加框加Coating，我當然選擇自己去配個相框算數。

如果相框一早已經有心水選擇，不妨叫佢寫埋款式落單，免得之後話無貨或者無得揀。

相簿應該包埋加保護膜，如果無寫明，就記得問。保護膜要逐張相，逐版相簿計錢，閒閒地百幾二百一張。印好自己再俾人加保護膜會平好多，最多最多加封面同封面就算。

Join package 之前應該有好多Sample 可以睇，但是要問清楚是否自己package的樣品，例如樣本可能比Package 包的相簿加厚了，例如樣本係韓式相簿，要加錢造，例如樣本有相簿書盒，但Package 唔包

23. 揀相後加錢位：特效相

有時候攝影公司會整D特別效果的相，例如多張相拼貼做一大張，最重要係Package 唔包，盡量唔好揀。

另一樣就係特別位置的相，即係相簿的封面同封底。正常應該包，無就要諗下。封面無新人相當然怪怪地，不過當日都多攤開相簿放，封面無乜機會見人，我覺得唔值得加。

24. 揀相後加錢位：快相

影相盡早影比較好，有時又要天氣好，又要有期，又要減下肥先，就遲左好多。太趕唯有做快相，趕唔切Big day 就無意思。影完相都要Keep 住留意個進度，小心俾人拖相，搞到要被迫轉做快相。

最好Join package 開單的時候寫埋預計要幾時交貨。還有，留意交貨期前內地有否假期，有的話要預留多一點時間。

25. 揀相後加錢位：向裁相說不？

一向對相 Size的觀念都係2R, 3R, 4R 等等，原來Pre-wedding D相不一定。更重要係有時攝影師會影爆，裁相就會有部分Cut 走左，可能無左部分身體，或者成個構圖都爛曬，唔想咁，又要加錢加返大張相。除非張相非留不可，否則唔會加錢加大。

26. 爭取排版

如果你對攝影公司的質素有信心，絕對可以全權交由他們負責。但要留意交 Draft後，可以修改的程度，例如可否另選相片，更改相片的次序，修改次數等等。

當然唔怕麻煩，最好還是可以自己安排，讓他們按你的要求出 Draft。

27. 防 Sell 攻防戰：計清楚價錢

揀相其實都好攰，所以要保持清醒，計清楚Sales offer 的package 係咪真係有著數。

28. 防 Sell 攻防戰：唔好怕黑面，亦唔好怕無面

Sales 可能會動之以情，話唔開單會俾人罵呀，攝影師好俾心機幫你地影同執相，唔買會浪費曬呀，唔好咁輕易俾人氹到！

有咩要求都可以提出，Sales 有時會話為難或者話無人咁做過，個個都會買相加Coating呀，或者話唔會咁淨係做少少，人哋還人哋，你有你的要求係無問題。

今次超長氣揀相 Checklist　終於完成了！下次要返轉頭寫返Pre-wedding 分享。

水水聯婚: Checklist 控系列: Pre-wedding 揀相貼士(中篇)

繼續我的checklist 控系列，交待完事前準備，今次講下揀相時候的貼士。 

想前文回顧的朋友可以參考呢度。   

12. 鏟相要狠 

呢點都好重要！決定你揀相效率如何。一開始就提醒自己要大量cut 相，因為只會怕太多，唔會怕太少 (當然有舖頭會話無得由刪走的相執返出黎，銷售手法黎。如果你揀曬都仲超過Package 包嘅數目好多，咁都好難要佢俾你揀返轉頭。但係如果你連Package 數目都無，我諗佢擔心過你)。 

我事前估算過比例大概係4揀1，無特別留手，第一round 只係cut咗一半，絕對可以再決斷啲。 

Sales 見你狂cut相，當然會話好靚cut咗好可惜，或者話可以keep住先再決定，呢個時候又係定力大考驗！但係Sales嘅意見有參考價值架，佢哋睇咁多自然知邊啲最好，都唔一定為咗要你加錢。 

13. 落相簿要樣樣都有：場景分佈平均 

除咗以上兩樣，Sales 都會同你講cut咁多無咗故事性會好怪。呢樣係好啱嘅，瘋狂cut相之際唔好忽略故事性，好多時候幾張相都係要留一齊留，要cut一齊cut，唔好諗住10個景就10張相。  

有啲場景/姿勢差唔多，決定唔落相簿，就可以決斷啲整組相cut 走，留返啲quota俾其他。呢個時候場景分類opt-in 揀相辦法就好有用。

14. 落相簿要樣樣都有：服飾造型道具 

留意會唔會揀太多同一件婚紗的相。影pw的衫越多，其實變相越難揀相，唔一定包多幾套衫有著數(何況換越多衫會霸咗越多影相時間)。

15. 落相簿要樣樣都有：雙人相為主

結婚相簿自然要揀雙人相，唔好揀咁多張單人，事前傾一傾大概要幾多單人相。 單人相好多時都會想keep，因為靚。

但係到cut相嘅時候，我哋就cut咗好多單人相。新郎同新娘同一個景嘅單人相會一齊唔要，一次過free 返兩個quota 而且比較唔會破壞相片連貫性。 好多人都會Keep 返多啲新娘單人相，要唔要狂cut 單人相就留返俾大家決定啦！我就為荷包著想忍痛放棄咗好多張。 

16. 照片類別要多變化 

靚係重要但唔係最重要！揀相諗埋排版。 

如果你嗰本係細相簿就唔使有特別排版，一版一張相。主要揀適合相簿橫直的相，不過記得揀多啲大頭同半身相，否則相已經唔大仲要個人都細，用放大鏡都唔知睇唔睇到係你。 

大相簿就要諗下配搭：呢度用場景分類opt-in揀相法都係好有幫助

係咪橫直相都有？係咪有16:9 大橫幅嘅相可以做兩版跨頁？會唔會砌出黎有好多留白位? 係咪有素材相/snapshot 相配襯？有無適合相俾你做油畫/簽名布/foam board/相簿封面/帖等等？係咪正面側面大頭全身搞笑正經嘅相都有齊？ 同場景、打算放埋一齊嘅相係咪揀咗同一個調色光暗？直相簿會唔會要多啲直度相？咁橫相簿呢？ 

17. 睇準時機偷影 

有機會的話唔好坐啲對住門口/辦公枱的位置，sales 一行開就拎手機影低啲唔揀嘅相，keep返黎留念 

我係無做過嘅，舖頭啲人都好好，無謂做個衰客人，慢性迫舖頭行無良商人嘅路線。 

18. To 執 or not to 執？ 

如果你好似我個pw咁係唔包全檔，當然要俾錢佢執相曬入相簿的相。包曬soft copy 係咪唔使煩？你都要搵相再細執同入相簿架。至於加唔加錢，就好睇你要唔要加多啲相落佢本相簿同覺得值唔值俾錢買方便。  

Softcopy 就唔執啦! 真係？睇相file 一般已經少執咗，要求唔高應該唔執都用到。呢度要搞清楚買Softcopy係咪真係買呢個file，定係只有從未出現過響眼前的原檔。 最好當然事前已經問清楚，執相只係加filter，執曝光，還是執肥瘦，黑眼圈，皺紋，眼紋，紅印，天色，雜物，路人甲。免得揀相嘅時候就話可以揀咗先，有得執，之後又話呢啲嘢執唔到。  

如果你好彩，vendor 肯跟你要求執，又或者慳妹自己淘寶執相，就唔好偷懶！逐張相睇清楚有咩要執，寫返張list俾佢哋。呢部分有b2b寫過教學文，可以參考呢兩篇： 

http://wow.esdlife.com/space.php?uid=26062&do=blog&id=203744

http://wow.esdlife.com/space.php?uid=58046&do=blog&id=246240 

19. 防sell 心理戰，要交戲：滿意？咩黎架？ 

記得就算鐘意輯相，都唔好表現得咁明顯，之後要拒絕職員的時候會容易啲  

20. 防sell 心理戰，要交戲：我係黑面神 

防sell 講到尾都係要夠定力，同有默契，之前有曬共識，唔好俾sales 氹下就應承。真係預到好難甩身嘅sales，唯有扮鬧交，都唔使好嚴重，其中一方黑面唔出聲應該已經達到效果。  

21. 揀油畫相 

揀油畫相原來都有心得，可以睇下呢度： http://www.canvassweet.hk/blog/wedding-canvas-how-to-choose-photo/  

油畫相嘅取態每人唔同，有啲人要好藝術唯美，有人要好正經嘅正面相。我自己就Mark 咗呢幾個point 

a. 正經/Chok 相同埋當然要雙人相 

睇得廣告多，覺得大相唔應該係啲太俏皮嘅相

b. 顏色鮮艷得黎又唔可以太花 

油畫會放門口，應該要有較Sharp嘅顏色先夠搶眼，但係唔可以太過花否則就突出唔到主角即係新人 

c. 及膝/全身 

我好衰咁覺得大相又大頭係似白事相，所以唔可以咁近鏡 

d. 背景和人物都要有

其實都同上一點有關，比較遠景自然要背景同人物都有。唔要背景太濛。  

e. 要一眼就認得出新人 

我覺得油畫可以係咪正面相唔重要，但要認一睇就得出新人，唔會去飲入錯門口。 

寫住咁多先，下次會寫埋最終回。

水水聯婚 --- Checklist 控系列: Pre-wedding 揀相貼士理想與現實

趁揀完相無耐仲記得，打尖寫咗呢篇先。事先我都有上網參考下其他人的貼士，等我加返自己經驗落去，遲啲再慢慢補返自己3次pw 分享。我發覺checklist控系列好似越寫越長氣，今次仲變咗上中下…

理想又有效率的揀相程序

1. 定下揀選照片的數目
2. 快速Screen 一次所有照片，有大概印象照片質素、分佈、景點
3. 1^st Round: 刪走不合格的照片（表情不自然，姿勢不自然，光線和取景不好／不完整，衣服頭髮沒有整理好，貌合神離，走光，顯肥，顯矮，有穿崩位等等）
4. 2^nd Round: 劃分好場景，逐個放入滿意、必選的照片
5. 3^rd Round: 檢視照片分佈，挑選影得唔錯，又較缺乏照片，務求令選出的照片在各方面都盡量分佈平均。另外，要考慮照片會否缺乏故事性，需要補上／替換照片方便相簿排版
6. 4^th Round: 重新檢視刪走的照片中，有無想留低的照片

寫得理想，即係和現實不一樣。我影了3 輯相：

第一輯Free coupon 選12張，但照片質素不太理想，所以沒有太多相的煩惱，反而我哋係煩惱點先揀夠數；

第二輯海外couple shoot，因為天氣不似預期，攝影師捱義氣同我哋影左少少，全部Softcopy 俾我哋，數量很少，我哋煩點先可以揀夠數印相簿；

第三輯香港pw，需要大量篩選相片，但職員才可以控制睇相，很難仔細比較，睇相次數又有限制。所以準備再多其實都只係一個參考黎嘅。我本來仲特登整咗張好靚仔嘅剔剔紙諗住用黎揀相，連拎出黎嘅機會都無………

揀相貼士－事前準備篇

1. 如果未揀Pw，非常建議揀有齊Softcopy的

可以慢慢自己揀相，唔怕相簿油畫唔啱心水要加超多錢轉款，免除大部分跌錢／被Sell 的不愉快經歷。無的話就事前盡量爭取多啲相，但係記得要白紙黑字寫明先算數。

2. 如果未揀Pw，除非對公司好有信心，否則唔好用同big day 同一間公司。

其實有好有唔好，同一間公司做曬，多數有優惠，整個過程會跟得足，起碼唔怕拖到過左big day 都未有相。不過相對地，用同一間就將所有注押在佢地身上，過程中有甚麼不滿都有所顧忌不可以反面，甚至連上網寫下Comment 都唔敢

3. 調整心態：相，夠用就得

非常重要！！！大部分人平日好少會化行妝、set曬頭、Chok 到頸斷咁影相、仲要P埋相，比平日靚好多係正常架！唔好因為咁就乜都要！好多人都有講過，婚禮完左唔會再睇。再靚的相，過兩個月就無感覺，理智啲！要衝破一生人一次的魔咒唔好俾Sales 用呢樣野Sell 到你！緊守Budget！

真的靚到非留不可的相keep幾張好勒，留個softcopy，靚相唔係四圍send 去曬命就係日日電話自戀下架啦！

記住最終目標只係夠相整相簿／Photo slideshow，揀相從相簿內容去諗。呢個都係之後好多個point 的原則。

4. 做定功課：決定最終消費上限

揀相好多時會揀多咗相，或者加咗好多upgrade items。記得事前有共識budget 可以加到幾多，揀相嘅時候唔一定有機會可以商量。如果真係要商量，記得唔好客氣叫職員離開一陣俾你哋商量下先。

我哋心目中有一個用budget 就按呢條底線去同sales 盡量傾個好啲嘅offer，最重要係按budget 狂cut 相。

5. 做定功課：決定相片數目

Budget 同相片數目好似都係一樣。無錯! 不過如果定咗一個相對低嘅budget 係咪就一定行得通? 

一本相簿起碼有大約10個平攤跨頁，相放相就最少20張相，如果排版有砌下相，就起碼30張相，比較豐富要40張。咁就要計下budget 入面係咪夠相用，否則最後都係要被迫加相填返空白頁。

6. 做定功課：記下Package 包括的項目，e.g. 照片softcopy 的數目（大執還是細執？）、相片尺寸、油畫或卡片等其他產品。

有幾個目的：a. Cross check 店舖有無錯漏；b.估算自己每個景點可以選擇照片的數目；c. 估算超大機會要加錢的項目，定下可接受的範圍

7. 做定功課：討論好每本相簿的主題，想要的效果，加快選相的速度。

最基本，相簿可以跟場景分或者全部mix埋

a. 場景：大路的分法，時間服裝都會變得比較連貫

b. 主題：全部場景都會出現在不同相簿，但是一本比較正經，一本輕鬆搞笑pose，一本側拍花絮。賓客即使無機會看過所有相簿都唔會miss 左某一個場景的婚照。

另外，要決定係咪每個場景服飾道具最少會keep返一張，因為排版關係，至少要有幾張才可以組成相關的一頁。一兩張嘅散相就純粹留念了！

8. 做定功課：了解揀相過程和中伏位

大家分享的貼士好多，但係最伏的地方多數針對返你個間公司先有。事前問下其他用家有D咩出事位，揀相的流程係點，例如會收埋D靚相加特別效果特別貴，例如買Package 送的相係細size/低resolution 入唔返相簿，例如照片排序會被打亂而不是按時序地點排列。

9. 多帶一個朋友去揀相

如果朋友對攝影有認識或者有揀結婚相經驗最好，旁觀者清，可以在新人決定唔到的時候俾意見。同Sales bargain offer 的時候，多個人睇住無咁易計錯數take 咗啲無著數嘅offer。

朋友之外，父母亦是不錯的選擇，因為長輩的意見最有權威性，對付sales最好。即使係其他朋友，多個人響度sales sell 人都輕手啲。但係千祈唔好帶太多人，人多意見多。

我哋唔想麻煩朋友陪我們坐成日，又想為婚紗相保留少少驚喜，所以無搵朋友。

10. 預留充足時間： 揀相前先食飯

揀相是耐力賽，之後不要安排任何約會／要事，有時間壓力很容易扺受不住職員猛力推銷。事前記得先食飽，最少預留3 小時（以全日影相計）。買所有檔就自己響屋企各自慢慢揀完先再merge埋揀做最後決定俾佢執相做相簿的list。

同埋除左揀Package 的相，仲要預時間揀相做油畫，做相簿封面，諸如此類。Sales 中間又會sell 下你，搞好耐！我哋揀相都睇左5小時，3個鐘free studio 個輯都搞左成個鐘先走。

11. 預留充足時間：建議約週末揀相

最好選週末揀相，平日下班到婚紗店/Studio 已經頗夜 ，沒有充份時間慢慢挑選相片。之後人地都要收工，很容易會對Sales提出的package 妥協，無得響度慢慢磨。

週末人客較多，Sales 亦相對無咁多時間黎睇住你/ Sell 你。有多啲其他顧客在場，就算店員對你施壓也有所顧忌。

寫住咁多先，記得留意埋中下篇貼士。