2018年4月23日 星期一

水水聯婚 --- 123文字錄：炒埋一碟vendor review III - Big day 儀式用品

今次大部分都係熱門選擇，無乜特別Comment，不過可以放多啲相。

儀式、用品
MC：朋友
好X10：一個超豐富婚禮MC 經驗，一個明明第二朝要返早shift 都幫手，佢哋真係超好！
依家好似多咗人俾錢請MC，最近出席過一個由專職MC主持的婚宴。當然同自己拍膊頭搵人做好唔同，有幾樣嘢我覺得優勝：
    1. 零DA：一個人都係可以超流暢控制氣氛，零空檔講到新人進場
    2. 全天候Standby：搵朋友幫手佢哋都要同人say hi吹水，職業MC就真係全部時間都負責你個job，全天候Standby唔怕搵佢唔到。有時仲幫你做埋額外嘅工作，好似幫手安排賓客上台影相咁。 
    3. 執生：我諗最重要係呢樣，經驗最值錢。因為熟習流程，可以幫你注意多啲出事位，識得自己幫你搵返其他工作人員解決問題。同埋有咩突發事情都識執生，唔好令場面失控，尤其是如果你有啲麻煩親戚。當然呢一點，都係講個信字。唔希望遇到，佢搞唔搞得掂你亦都只有遇到先知。  
我又點解無搵？ 
  1. 慳錢：圍數又唔係多，又無咩特別流程，簡簡單單就可以。所以呢項有啲雞肋，唔想花錢係度 
  2. 朋友經驗豐富：雖然我哋兩位MC唔係全職，但係都幫過好多朋友做MC。我對佢哋係200分有信心。 
  3. 唔想咁商業化：比起父母的年代，婚禮有好多項目都已經唔搵朋友幫忙了，變成搞婚禮如搞event。所以希望搵個識得我哋嘅朋友擔當呢個角色。
證婚律師：吳瑞明@壹誓
好：價錢平 (雖然我哋唔係揀最平嘅Plan)
好：有婚前Workshop (見Big day 微管理手冊證婚晚宴(上))
好：已經準備證婚用品：羽毛筆，筆座，誓詞卡，戒指枕，證書筒
壞：出名嘅律師Join 貴plan先可以揀（其實佢幾個唔同價錢的Plan，我覺得真係分別唔大）
注：如果有心儀的律師，記得盡早預約，特別係旺日結婚的新人。我年尾結尾，1月在婚展預約的時候，都已經有好多律師無期了。
戒指座 : Lego wedding set
注：大家多數用公仔雙手Hold 住戒指，不過因為大細唔係咁fit公仔雙手距離，我就選擇就咁勾住。
注：出咗2018版



Vow card: DIY
愛的宣言: Easy wedding
好：快靚正，價錢可以接受
壞：主要係卡通背景，無公仔嘅得好少款式 (除咗揀款我都有揀過內容，呢間都算選擇多)
壞：質素一般
注：如果時間充足，建議DIY/淘寶/印刷公司印，相信款式內容都會比較啱心水，價錢亦更加相宜。
欄門繡球: 我準備咗兩個，大門一個，房門一個
大門花球：淘寶+深水埗珠仔街DIY
房門花球：淘寶
喜帖: 淘寶
回禮利是封：淘寶
注：我也在同一間淘寶店－甜甜囍坊買了其他婚慶用品和佈置用品，例如利是封：
Invitation card: DIY with GreetingsIsland and icon8
好：免費，而且有好多Template，又簡單易用
好：可以修改內容
壞：有浮水印
注：GreetingsIsland 的template 主要可供修改文字，所以我另外在icon8下載了icons 加到template 上。
過大禮禮籃+回禮: Easy wedding
好：簡單方便 (已經準備好套裝，分店在尖咀百利，太子金都，元朗)
好：質素好 (奶奶大讚回禮糕點新鮮)
壞：自己散買（去街市，齋舖，或者專賣蒸包的連鎖店）會平啲
過大禮海味:  安記
過大禮果籃 :  果欄寶生棧
好：整體都幾好，可以加錢送埋貨
壞：比起自己買生果，一定無咁平同靚
上頭用品：過大禮籃附送
上頭睡衣：Easy wedding
好：可以試啱Size。因為普通款咁啱無曬XL，所以我買咗花邊款，質地係會好啲。
壞：淘寶一定平好多，因為都無咩手工可言，同埋會甩色。
除了之前提到的愛的宣言，有其他淘寶唔切要補購的用品我都在Easy wedding 買齊，例如紅米
唐餅:  奇華
好：方便，分店多
好：產品種類多（唐餅有好多款，有出迷你版，又全部獨立包裝。唔食唐餅又可以買其他曲奇麵包等等）
好：可以憑收據租借過大禮盒同禮金盒，同免費拎紙盒(上面過大禮幅圖有樣睇)。如果唐餅數量唔多，擺唔滿木盒，木盒可以留返黎放海味。
壞：唔好食（真心覺得某啲唐餅佢整得超難食）
壞：偏貴 (婚展買抵啲，同埋加價加得快，決定咗可以早啲買)
注：好多人都知嘅小貼士，餅卡係換一盒禮盒嘅唐餅，如果變成自己執返等值唐餅會抵啲(又可以揀啲鐘意食嘅唐餅)。
西餅:  東海堂
好：個人意見，呢間西餅蛋糕比較其他餅店吸引
好：餅卡可以印相
壞：西餅單價貴，$50餅卡面額可能只係換到兩件西餅
注：如果打算換西餅big day招呼親戚朋友，唔建議換東海堂，太大件同大部分都係mousse /cream)
豬肉券:  太興
好：分店多，可以換其他食品，唔啱食都可以用黎食飯
壞：價錢偏貴，部分長輩可能介意真係用黎換燒味只可以換好少
壞：只有每年一次週年特價，規定係一本23張咁買
回門乳豬: 名苑
回門果籃: 一田水果+DIY包裝
好：平！同埋可以揀靚生果
壞：要自己識包裝
龍鳳被: Casa Calvin 1200針印花套裝
好：耐唔耐就有特價（可以特別留意崇光同一田減價）
好：特價多數均一價，買大呎碼會比較抵
壞：留意特價包唔包括婚慶系列，未必每次都有

Checklist 控系列


張貼者： 於 沒有留言:
標籤： , , ,

水水聯婚 --- 123 文字錄：炒埋一碟vendor review IV - Big day 服裝飾物

呢個項目上，不得不說一分錢一分貨，除非有Model身型能輕鬆駕御任何裙款。真係靚衫無限，唯金錢時間有限。自覺租衫的項目上都算慳家(自己租嘅兩條裙同老公租兩套西裝差不多價錢，應該都唔算貴啦？)。我覺得Big day搵衫都係一種緣份，無論幾靚幾鐘意，到最後都可能因為各種原因揀唔到心中的首選，所以唔多值得撻訂轉裙，當然俾完訂覺得中伏另作別論。個人意見，不喜勿插。

服裝飾品
求婚鑽戒: Love bird diamond


呢間舖係老公自己上網揀，所以自己無咩Comment。
好：價錢較經濟
好：免費改一次呎吋
結婚對戒:  I-primo  
我係揀呢對，當時都無諗住買，所以無留意點樣買先最抵。實物係輕巧好多，老公話鐘意佢無乜存在感



屋企人唔想四圍走，所以親身到店的只有永隆同錦發。好多人大推錦發，但係我去睇衫的經驗又唔係幾好，所以在永隆租咗。 
好／壞：價錢好海鮮，有機會可以叫阿姐俾個靚價你（我當然又失敗咗） 
好：阿姐有求必應。因為我身型比較高大，啱碼數選擇唔多，但係阿姐都有盡量搵我想要的褂俾我（雖然我最後租唔到我心心念念的龍柱褂） 
好：價錢較經濟 
壞：星期六日真係好多人，要等比較耐 
壞：還褂要下午兩點前，時間有啲緊迫 
壞：裙褂比較殘（當然價錢都有關係）
婚紗晚裝:  Heanna Bridal - 1Wg+1eg
好：店主Nana好好人，有問必答。Hold咗裙之後都成日打攪佢再試裙。
好：主打一婚紗多著，可以配搭多款配件 
好：Vintage同魚尾婚紗較多 
好：價錢較經濟 
好：還衫都易話圍，大致望過無問題就會退按金
壞：拖尾要加錢 
壞：配襯首飾唔夠吸引 
壞：店主忙，fb 更新得唔係好密，新款要問店主 
壞：即Join的折扣唔算太多(要即join先有得任轉)
壞：西裝/媽媽裙款式較少, 顏色比較特別
壞：因為店主自己造裙改裙，所以唔會Keep住都有大量新裙
壞：部分裙會較舊，同埋有見過其他舖頭有同款裙，揀返店主自己造的裙會比較好
注：開班教公仔婚紗 (可以留意店主另一個Page Nana Workshop) 

題外話：雖然最後因為想揀返在尖沙咀的店舖而無Join到，但係White Love Bridal 真係好值得推介。性價比高，價錢亦唔貴，仲要難得地比較多大碼靚裙，同埋店主好好心機幫大家試裙，任試任影。 

迎賓晚裝: pop up store
好：超抵，後悔無揀多條 
壞：款式同碼數（偏大碼）選擇唔多 
壞：無試身 
壞：pop up store可遇不可求 
尾魚款真心靚，以為自己對魚尾款無fantasy，結果睇相最鐘意都係呢條裙 
晚裝改裙:  濱祺時裝改衣 ( 鴨脷洲利東邨商場街市109號鋪 | 10am-7pm )
好：平 
壞：無得即日拎 
壞：地點唔方便 
好/壞：第一次改已經超啱身，反而我要求改返鬆少少就有少許出錯 
壞：試身位唔太方便
新娘褂鞋:  la Godasse: (鞋墊: 淘寶，鞋夾: wow)
好：價錢平 
壞：有時店員態度麻麻 
壞：未必每個款都齊碼（我係大腳新娘） 
注：店內另有bling bling手袋出租 
注：記得自備購物袋 
新郎西裝:  The ideal man - 兩套
好：服務好 
好：店舖環境好舒服 
好：可以提早一日拎衫，還衫又無限時間 
壞：款式唔算好多 
壞：兩件先有折，要Full paid 

新郎皮鞋:  有利鞋店
好：價錢較平 (有同媽媽去百利睇過晚裝鞋，全部都好貴，因為無咁大碼要訂造)
好：老闆好好人 
好：有大碼鞋／可以訂造 (唔單止有碼，仲會幫你睇下要唔要整返闊鞋頭，會唔會有邊刮腳要整返軟)
壞：款式較少和較平實 (新娘婚鞋真係無百利金都鞋舖款咁靚)
壞：週末人多
男禮恤衫:  趙太
好：碼數齊 
好：即場改衫 
好：趙太好好人
壞：唔係日日開舖 
壞：舖頭淺窄，六日都等比較耐
老爺外父西裝: 羅湖城訂造
奶奶媽咪晚裝: 羅湖城 雅典
媽媽晚裝鞋:  有利鞋店
見上
晚裝裙袋: 淘寶
款式1
款式2
無乜特別好壞，不過留意：
即使裙袋有厚度但係大拖尾一類的婚紗仍可能放唔落／唔可以摺埋，比較適合放晚裝。
AEON/日本城等家品店都有衫袋，但係最長都只係大約110cm，如果夠用其實唔需要淘寶。
金器嫁妝: 六福珠寶
好：會準備埋紅領俾你襯金鍊
好：服務好（雖然呢樣唔關舖事，睇下遇到Sales 好唔好）
好：同款有較多唔同重量選擇（我揀咗的龍鳳鈪起碼有3,4種重量可以揀）
壞：款式比較普通唔算特別吸引(部分原因係我小家唔係好想花錢在手工費上）
壞：款式轉得無咁快
壞：手鈪有少少變形，要Check清楚先拎走

小小個人經驗：
  • 六福入手曬全部金器主要原因係媽媽無耐性去唔同舖頭買><　其實唔同舖都有各自招牌靚款，我係想分開入手架！
  • 周生生款式比較靚同造工比較精緻（可能同重秤有關），但偏重手同埋較扣款較多，預算唔多的話可能選擇有限。花鈪款較多和靚（例如有銀杏，玫瑰，蝴蝶等等），部分龍鳳鈪設計比較新潮款式，仲有就係龍鳳耳環靚。非常建議銀彈充足嘅朋友選擇。生生有囍系列
  • 周大福立體浮雕款靚但係手工費貴。完美婚嫁系列 (網頁款式太少，直接去舖頭試好啲）
  • 一般抵買度（重秤度）：豬牌＞花鍊＞龍鳳鍊。當然豬牌係無咁靚，同埋豬牌款式好多間都差唔多款。
  • 如果唔介意牌子，去細舖可以平好多。同埋依家有999制度，唔似以前怕唔純正
  • 無穿耳的b2b係戴唔到金耳環（因為只有耳針），可以考慮珍珠／仿金（大推DG耳環，見後）
  • 龍鳳鈪圖案好多時似雞多過似鳳，如果長輩比較在意就要花心機行多幾間比較款式
  • 可以試下講價，不過我唔成功（我在呢方面真係好差，婚禮都無一樣嘢成功講到價）
  • 金價都頗為浮動，啱價就要即刻入手，唔好諗住等到Weekend，可能到時又升咗（雖然未必控制到）每日各大金行飾金價格
  • 留意金價計法各舖頭會有少許不同：一般當日金價（間間唔同）+2%佣金 + 手工費。周生生免佣，但金價會較其他舖貴，所以其實差不多。另外有特別款的金器，係劃一價，唔按呢條公式計手工費。依家多咗珍珠加黃金的首飾，當中的珍珠一般唔計，只係以黃金部分定。
其他注意事項： Big day 注意事項 - 衣物花飾篇
新娘首飾: Dearest grace  團購夾耳環 
好：推介無耳窿的b2b戴呢對耳環，可以免費改成螺絲夾
好：金色非常閃，唔似其他仿金拼埋金器度顯得超暗啞。浮誇配搭非常適合big day
好：團購價好抵
好：雖然團購有好多限制同唔方便，但係要讚下舖頭無對因團購而暴增上去齋睇唔買嘅b2b 唔友善(真係勁多人上去渾吉)
壞：耳環比想像中重，平日戴可能無咁舒服
壞：團購出貨嚴重Delay，收貨期一改再改
*** 要再次感激團長同一眾幫手的b2b ***


好：免費借
壞：規定借還時間，要預約到店揀款
壞：指定店舖才有，唔係全線可以借
好：真鑽石真係好閃！
姊妹裙: M2 wedding
好：唔同色唔同款都唔使加錢
好：不定期唔同質料裙款特價
壞：時間少許唔方便
壞：改裙未必可以即日取回
其他貼士可參考 姊妹裙Q&A
兄弟呔: 淘寶
襟花手花: 奶奶朋友
Vendor review 接近尾聲喇！下次寫埋最後的攝影化妝就功成身退，多謝支持
Checklist 控系列


張貼者： 於 沒有留言:
標籤： , , , , , , , , ,

2018年4月10日 星期二

水水聯婚 --- 來自羅湖嘅靚爆鏡媽媽衫

因為覺得媽媽們Big day 衫太靚，忍唔住要另文介紹。可惜我無乜影相，主力靠文字描述。

本來已經帶媽媽去百利試完一輪衫（都係去大舖地下C字頭同B字頭），但係好似都唔多啱心水。奶奶又一早表示有朋友響深圳相熟舖頭造開衫，就叫我哋一齊去睇下。

舖頭就在羅湖商業城5樓，其實兩位爸爸嘅西裝都係在羅湖商業城度身訂造。造衫嘅舖頭只集中在5樓，但係唔好睇小，其實都有好多間訂造晚裝嘅舖頭。題外話5樓另一邊係布市場，大家亦可響度自己買布再叫舖頭幫你造衫。
形容下間舖(圖文不乎，唔係上圖呢間)，羅湖城啲舖一般都係細細地，好似街邊啲Boutique仔咁上下。我哋去間舖近住巷尾。最內面係改衫的衣車位同試身位（有兩個），跟住兩邊就全部都係衫。舖頭大概有1/3係旗袍款，2/3係晚裝款。晚裝款入面有啲係新娘裙。門口放咗好多圓櫈，同行的男仕們可以坐住等。通常一班人起碼都3,4個一齊去，有得兩Group人響度試衫會有啲迫。我哋揀衫係6個人添，4大長老加老公同我兩個小跟班！

原來奶奶已經自己事先去試過裙，揀過衫，今次特登試返俾佢個仔睇下。佢揀咗一條新娘裙款嘅裙，叫舖頭幫佢改返細個裙擺。睇下Sample先，原裝呢條裙真係好重。

然後佢想揀多一條裙敬酒送客。（原諒我影相鬆郁濛）揀咗呢條香檳色，唔好因為我影相差就覺得佢唔吸引，實物係好靚，奶奶一路試裙一路舖頭不斷有其他客問呢條裙，話好靚，佢聽到好開心。
其實有一條裙佢更加心心眼，不過呢條裙真係貴，最後都無揀到。但係至少要試下上身。
兩位媽媽有一樣嘢非常合拍就係唔要旗袍款，一個嫌著得老，一個嫌顯得肥。我自己母親大人最後佢都揀到兩條裙，無錯，佢話跟返襯家揀兩條喎！睇睇相先。
好快佢就決定要呢條紫色魚尾裙，但係另一條就揀咗好一陣。明顯因為唔鐘意藍色 (唉！話說我開初試裙有條好鐘意嘅粉藍裙，但係被人間接reject咗，傷心)，紫色已經有，呢條又真係著得靚。店員話因為呢種布無第二隻色，所以轉唔到色。結果靚衫戰勝咗迷信。

我觀察到媽媽輩好多時關注幾樣嘢：
1. 顯瘦：生得出你咁大個男/女，都有返啲年紀，有返個肚腩仔一啲都唔奇(雖則兩位媽媽身材仲好過我，查實佢哋唔使擔心) 
2. 有袖：一黎要遮手臂，二黎怕露出個膊頭會凍 
3. 鐘意買多過租
4. 顏色要Sharp啲，精神啲，唔可以咁深沉

我兩位媽媽都唔例外，要改少少款，將雞翼袖裙改返做長袖/短紗袖。奶奶另外要求改動lace 同閃石擺位。店員好易話圍，全部都照單全收，仲話兩個星期可以試身。

不過世事邊有咁完美，兩個星期係未試得，好彩再過咗幾日就話有得試啦！只係老公同我Weekend 先得閒北上，所以等多一個星期。試身比較快，因為主要都係試返大細呎碼啱唔啱，條裙係未訂花，只係得車左布。試完身就等拎裙，今次要耐啲，特別夾住十一黃金週，大約5星期後先有得拎。之後我另外淘咗啲裙袋俾佢哋入住啲裙。

俾大家睇下Big day效果。舖頭有俾兩位媽媽嗰兩條短袖裙款配返條薄紗當披肩（即係一開始試衫相嗰種紫色紗）
仲有咩感想？
1. 比我心目中的價錢偏貴，因為呢間舖頭唔係好接受講價。又或者我哋個樣太善良，講價講得唔夠出力。藍色裙呢啲比較普通的款式應該仲有好多減價空間。（最後我係有私下補貼）
2. 交價準時。雖然試身遲咗少少，但係都算準時交貨，唔使不斷催交貨。
3. 選擇多，款式多。羅湖城啲款多過香港租裙舖頭好多！香港舖頭啲裙款大同小異，改下領，改下袖，轉下色就當唔同款。始終羅湖城係造裙，彈性好多，我帶媽媽去百利試裙的時候都唔多款可以揀，一係無期一係無碼。
4. 完成品質素比我想像中好好多，但係都係有大陸的通病，落單的時候就乜都得，但係造出黎都係跟佢自己嗰套，非常有個性。奶奶要求條裙改釘花，寫埋落單，次次都提，最後都係無跟足做。（最後奶奶再上多去一次拎裙）整體黎講，細節位會比較求其，但係如果叫佢執佢都會幫手。

身為checklist控，唔加幾個私伙貼士點得呢？

羅湖城造裙貼士：
1. 可以先去金都百利尖沙咀睇下款。香港舖頭啲裙款，多數都會有。大約知道邊類裙平啲，邊類裙貴啲。如果有想要的裙款都可以Keep起，問下羅湖舖頭造裙幾錢。旗袍款多數會平啲，越多釘珠釘閃石就越貴。
2. 食咗午飯先去，舖頭多數無咁早開門。起碼都十二點幾先開齊。可以的話，平日去好啲，週末下午時段最多人。
順帶一提，可以在同層的酒樓飲個茶先，有丹桂軒和小桃源，兩間都好多人。丹桂軒價錢較貴但係好食啲，想食記得早啲排隊，午飯時間等候時間可以係以小時計。
3. 如果皮膚容易敏感，記得打底，同埋盡快沖涼。媽媽同奶奶有分別話試衫之後皮膚有啲唔舒服，不過唔嚴重嘅。
4. 先安裝Wechat。若然你未有acc，最好開一個，方便同舖頭聯絡。
5. 諗定點樣打發時間。揀裙要揀幾耐好睇個人，我哋第二次去fitting 就係最快，個半鐘多啲就可以。最後拎裙就搞咗好耐，特登等開門試咗裙先食午飯，等佢可以執返好俾我哋拎埋走。佢哋都只可以在舖頭無咁忙嘅時候偷時間改。中間嘅時間只係齋等，同不斷睇下佢改好未，所以如果你之後唔得閒都幾麻煩，隨時要再去多一次。
6. 唔好怕煩，同埋有要求要堅定提出。好多舖工序比較求其，拎衫要睇真啲，例如釘咗面層花線，但係仲有好多線頭線尾無剪返。又例如阿爸試西裝覺得窄，舖頭又堅持個款係咁，講咗好耐真係太窄先肯改。
7. 除咗Keep 單，睇清楚係咪更改要求都寫齊。最好影低試衫相，真係貨不對辦都有相為證。
8. 自備裙袋。晚裝防塵袋係唔包，另買好似要加20人仔。我無買到，同佢哋另外淘咗啲厚實嘅婚紗衫袋返黎。

——————————
Checklist 控系列



張貼者： 於 沒有留言:
標籤： , , , , ,
訂閱： 文章 (Atom)