水之二次方: 水水聯婚 --- 123文字錄：炒埋一碟vendor review II

密密打，今次Review big day items，係我覺最重要的場地同食物。因為我左睇右睇最後都揀返同一間酒店出門，所以可以一齊Review埋。

特登早啲寫埋呢篇，因為今個Weekend 有Open day 呀！用到優惠真係可以抵好多。

場地飲食
晚宴場地: InterContinental Hong Kong - Habourview Room (16圍)
證婚場地: InterContinental Hong Kong - Habourview Room

好：老牌五星酒店，有品牌價值
好：服務有保證
好：食物質素有保證（不得不提個燉湯真係好好飲！Big day 之前我已經決定就算當日全部餸食唔到，我都要飲個湯）
好：長形房無柱
好：無敵海景，睇住幻彩詠香江開席。呢個海景真係好靚！

好：地點方便（位處尖沙咀應該任何地區前往都方便）

好：明碼實價（收費項目合約都有齊。但相對地可以送的items都一早送咗寫咗，好難可以再傾到多啲優惠）

好：回覆迅速（過程中基本上所有電郵都即日覆到我）

好：提供基本佈置（雖然我哋另外再join 咗佈置package）

好：送每圍鮮花佈置

好：好貼心咁在新娘房準備好支裝水同拖鞋

壞：貴！但係相比其他尖沙嘴的酒店又唔係貴太多，因為好多酒店都Set咗一個好貴的min charge。不過後來聽聞min charge 係有得傾，我諗呢啲都係睇大家講價功力。（我地兩個不是生於大富大貴之家，請飲時都有唔少人驚訝竟然揀咗洲際。雖然大家都好錫我地，人情都幾重手，但係都少不免圍圍貼錢。）　

壞：樓底矮（好彩因為全房落地玻璃都好光猛，但係就唔使諗水晶燈，同埋難免台上大合照效果無咁靚，甚至因為要用魚眼鏡而有少少走樣）

壞：裝修較舊式（洲際係有翻新的打算，翻新完應該唔同曬）

壞：電視少（只有台的Projector 同兩部在窗邊的電視可以播片）

壞：正式交場時間偏遲 (18:00，最後因為有Lunch banquet 可以早交場俾我哋)

壞：限制較多（事前無諗過原來酒店有啲項目係要用返佢指定的合作伙伴）

壞：無麻雀房（地下個廳只有一間房，用咗做新娘房就無得打麻雀）

壞：後補返，最好提揸車嘅賓客唔好咁遲到。因為大門上落客位好迫，傍晚車多起上黎真係無位走，前面唔走就入唔到去，隨時塞在出面斜路仔慢慢等先入到去

出門酒店: InterContinental Hong Kong - Deluxe Suite （加錢將贈送客房upgrade 到套房）

好：大（有1100 sq. ft.！淨係門口玄闗位都夠曬大，慢慢講掂數先放兄弟入黎）

好：多窗，有海景，光猛（但係我出門個朝停咗躉船在出面破壞咗個景，好傷心）

好：超大厠所（浴缸超正！可惜Big day 前一日忙到爆無機會享用。厠所亦係全房最光的位置，廳同房都偏暗，唔方便化妝。出面就係衣帽間）

好：多一個客厠，唔使爭厠所

好：大門噴水池影相靚（少少遺憾朝早無得在大樓梯影相，因為一早就封咗做佈置）

好：提供敬茶用品，連紅棗蓮子都準備埋（有超多隻杯，姊妹唔使怕洗唔切。不過如果要龍鳳被就要自備）

壞：裝修略舊（可能係房間用色問題，但是絨面梳化過鏡後真係麻麻）

壞：走廊偏暗

壞：停車上落客時間短（正門好多車出入，特別下午傍晚好多位都泊滿車，更加會要大巴盡快駛走）

注：酒店房價真係上落好大，呢間房高峰期網頁價係$13000+10%！到最後Confirm 的時候係回落到$7xxx！
婚宴回禮: 朱古力 by InterContinental

結婚蛋糕: 雜果蛋糕 by InterContinental
場地佈置: Grand forest - 佈罝Plan B 布藝+印刷 (連座位表)

好：價錢平（我只係比較咗酒店Partner的佈置公司，相信如果自己再搵可能會有較平的選擇)

好：非常熟手迅速（當日lunch banquet 完咗，清理完交場都差不多4點，但係我哋5點半證婚）

好：佈置用品較彈性（藤球／柳枝／花枝／紙花一類佈置用品基本上任搭，我哋唔想用人形紙版公仔亦可以改成Seating plan）

好：回覆迅速（提出要修改都極速改好）

好：舖頭位置方便，就在金都 3樓

壞：要主動問先Send 開會傾好的job list 俾我留底，同埋有時稿件都要問先收到