在網店見到有立體囍字Lego，本來諗住砌一個，但係又覺得淨係big day reception見到出鏡率太低，又唔夠搶眼，所以就決定整另一個都好靚嘅囍字牌。咁就可以拎埋去影Pre-wedding，Lego 的 wedding set 作為Pre-wedding道具實在太細又太脆弱了。可惜，最後囍字牌嘅出鏡率不高。不過我係200分滿意呢個DIY，所以都要放上黎自戀下。
基本材料：
整呢個囍字牌材料非常簡單
1. 紅色基本組 Lego
2. 方形萬用框 X1
Custom made 材料：
以下呢啲就自由發揮，全靠呢啲變屬於自己嘅囍字牌，我就準備咗呢啲
3. 白色 Lego 1X1光面磚 X18 (英文名+日期)
4. 白色 Lego 4X6薄磚 X2
5. 紅色 Lego 心心 X2
6. 紅色 Lego 2X2光面磚 X1 (加工做囍字磚)
7. 七彩 Lego 花花 X8
8. Lego 人仔 X1 (一對)
工具：
a. 熱溶膠槍 / 萬能膠
b. Marker / Label 紙
c. 巧手一雙
如果大家唔想煩可以直接去Lego網店訂購，除了立體囍字和這個囍字牌還有其他產品，咁就唔使煩勒～ 自己整成本都唔平架，因為Lego 結婚人仔都貴。
Step 1：囍字
砌囍字一啲都唔難，砌4個"口"字同"十"字，夾埋佢就得。哈哈哈，係咪好簡單呢? 如果真係要圖樣都可以問我拎嘅。事先聲明係無咩用，純粹用黎計下買幾多舊磚，若然買唔齊Lego磚都要改圖樣。
用多啲長磚當然無咁易散，不過都一樣唔重要。點解？話說我開初就係無落膠水黐實佢就拎去影pre-wedding，結果個牌係陷包散！所以最後一定要用膠水黐實Lego 同個框！
用長磚都仲有一個好處，就係靚啲，少啲空隙。
邊度買Lego？
我係響淘淘買磚嘅，貪佢有香港舖比較少有散賣嘅長磚。
如果想香港買，可以到：
(1) Lego 專門店：有一幅Lego 牆俾大家自己執
(2) BxxxxxCxxxx特約店：有不同的磚散賣／以小包出售，不過較少用的磚有機會缺貨。
(3) OxxxFxxFxx工廈店：一樣可以散賣，比 (2) 好的地方是可以用顏色分類揀磚
Step 2：光面磚寫字
有心機啲係可以刮上去/印上去，我就只係用Marker 手寫。大家想靚啲係可以去買啲刻字嘅 Lego磚或者買自訂印字嘅磚。用Marker 寫唔多唔少都有少少化開，完美主義者不適用。
手寫當然係會有啲意外，我寫個７字咪７咗。呢個時候又無後備磚，又趕住用，唯有塗改。用咩改？係洗甲水！洗甲水除左會洗甩啲Marker 會連舊磚都溶埋！清理完後塊磚面一啲都唔光面。如果大家要抹磚，用透明指甲油最好！真係估佢唔到！結論係，大家記得買多一兩塊磚做後備。
後來先記起，我有印Label 機，就咁貼上去咪得，洗咩搞咁多嘢！遮遮醜先～
Step 3：裝飾配件
基本部分完成，就要同佢扮下靚。我響Wedding set 同 Valentine set 偷咗啲唔同彩色嘅花仔黎裝飾。Btw, 我覺得 Valentine set 好靚！當初有衝動Pw 跟佢影返張相。
至於心心，其實由兩塊正方加半圓嘅Lego磚砌埋，我左右各砌咗一個。留意返個心心只可以側放，正放一係加多一粒細薄磚響中間，一係就黐膠水。
DIY 最邪惡嘅地方就係永遠都整唔完，左砌右砌一大輪之後，都係覺得上面乜都無唔夠平衡，所以就去砌咗兩隻人仔加上去。加埋個囍字，靚曬！而萬用框，家品店買唔平，勝在隨時買到同夠深度。只係得黑白兩色，想要其他色就要響第二度買/後期加工。一分錢一分貨，比想像重好多，放枱夠穩陣，拎住四圍去就嫌太重。
Step 4：大合體
最後步驟當然夾埋曬所有配件！左擺右度完一輪都係上面放人仔，下面放日期最靚。
～～完成圖～～
超鐘意呀！如果大家想簡簡單單玩下DIY 呢個真係啱曬你！
沒有留言:
張貼留言