越寫Big day checklist 就越覺得自己都幾怪獸新娘，細眉細眼都要理，所以改咗標題做micro management。Big day 當日證婚迎賓入席直落，本來打算寫個完結篇，點知又越寫越長，又分咗上下篇。
新娘房及簽到枱：
1. 到達場後第一時間檢查提供的物資和佈置是否齊全，事先送到場地的物品有無錯漏。即使要修正也需要時間，特別是後加的要求，極大機會有錯。
2. 新娘房準備全身鏡：固定的新娘房多數有梳妝枱，化妝鏡都夠大。但是如果係由function room set的新娘房，可以安排多一兩塊全身鏡，方便mua化妝，座台的化妝鏡太細。
3. 新娘房無人就鎖門。鎖門拎嘢擺嘢係會唔方便，同埋mua 無得留在房(話說當晚佢要在房旁邊嘅厠所standby, 好慘。如果mua入席就坐近主家席方便啲)。但係就避免唔見貴重嘢時mua 水洗都唔清。另外就係確保無人可以霸住間房，每次新娘換裙都一定第一時間可以用。
最好唔好咁多人出出入入/留在新娘房，特別是男士。但是當天大家總有千百萬種理由：借厠所啦、換衫啦、借位擺袋、大廳冷氣太大／太焗啦，控制唔到咁多。
4. 簽到枱人手－男女家至少各有一位親戚：兄弟姊妹又未必認得親戚。另外，圍數多最好有張大啲簽到枱，否則人多時想埋去放咗人情都無位。
5. 簽到枱人手－任何時候都有人：例如證婚儀式時，開席後，兄弟姊妹大合照時，親戚大合照時，一係就漏咗叫埋簽到枱的人影，一係就無曬人在簽到枱
6. 簽到枱人手：負責Reception的兄弟姊妹或者親戚基本工作 (按重要性排列)
a. 歡迎來賓並請來賓留名(視乎形式，簽名冊，簽名板，簽名布，手指印，即影即有等等)b. 收禮並確保有署名 (特別是禮物或者禮到人唔到)c. 幫新人Mark 低出席來賓和收到人情d. 告知來賓坐位安排e. 補發喜帖或派回禮小禮物f. 請賓客享用Candy corner, 席前小食, cocktail等 (較早時段，後段人多請MC 開咪會好啲)g. 如有麻雀房/Photo booth 等可以提醒來賓(較早時段，後段人多請MC 開咪會好啲)
7. 簽到枱物資－點名紙分組排：人名分組排再搵枱號會易啲，因為擺位問題鄰枱枱號不一定也相鄰。可以的話寫埋親戚稱謂/中英文名。
8. 簽到枱物資－小心結婚相變花面貓：總會唔知點解有人簽到要簽在新人塊面上面。準備定膠片/膠file 有需要時遮一遮。之前提到圍數多要大啲嘅Reception枱，另一個原因係要大啲嘅簽名布，張枱都要夠大擺先得。
9. 簽到枱物資－加大碼人情袋：準備大size的人情袋，圍數多者更甚。個人覺得用不透光的袋放人情安全啲。
準備長型利是封給賓客入人情會好啲，唔使摺易入啲，又唔使咁厚。
同埋新娘房個夾萬仔未必放得曬金器首飾人情，放唔落就要搵人另外Keep起，或者放上酒店房的夾萬。新娘房夾萬千祈唔好塞咁滿，話說我當晚塞到頂住咗個鎖，職員用萬用匙都開唔返！
證婚儀式：
Esdlife 呢度乜都有，之前都提過一啲貼士。仲有就係壹誓婚前workshop都提供不少貼士。我在呢點度再加咗啲分享。
*** 揭頭紗部分 (Big day 注意事項 - 衣物花飾篇) ***
原文：
10. 證婚儀式千祈唔好快：March in、讀誓詞、戴戒指、揭頭紗等等，請全程以慢動作進行。確保攝錄影師有時間拍下需要的鏡頭。合照可以NG，簽紙無架！
一般程序：宣佈儀式開始＞新人進場＞證婚人上台就座＞新人上台＞律師簡短講解＞交換戒指＞宣讀誓詞＞揭頭紗＞接吻＞簽紙＞合照＞完成證婚［附加部分：＞雙方父母一同合照＞祝酒＞切餅＞來賓合照＞拋花球＞大合照］
11. 證婚時各人位置：其實律師同場地職員或者攝影師到時會提，之前睇/聽咗到時都係一片空白
a. 新娘新郎企位：男左女右(台上面向台下)，一般Backdrop 有新人名牌，企返在自己名前面就無錯b. 賓客座位：證婚人要坐最前，一般是新人父或母。賓客當然按新人企位就坐。可以先安排新人父母就 坐，親戚自然會坐返相應一邊。新人朋友就無咩所謂。真係好介意坐位，就儀式開始前請來賓就坐時，搵一兩個兄弟姊妹帶位，或者貼個牌分男女方。c. 賓客座位：兄弟姊妹幫手盡量請賓客坐前啲
12. 進場：其實都唔係必須嘅
a. 如果會分批步入，其間記得關門。例如有4組人，按序加插埋關門位可以是花仔花女(關門)兄弟姊妹(關 門)雙方家長(關門)新人。可以避免賓客/影片見到一大堆在門外等進場。b. 如果有花仔花女，預留時間給他們綵排/briefing。讓他們自己走完即可。傳統上花童應該會拎戒指座/枕，咁戒指要縛實/黐實。穩陣起見，可以事先放在枱，花童拎下花籃牌仔。c. 邊個同新娘進場？如果有兩次March in ，多數證婚揀由外父(亦有搵新娘嘅兄弟)帶新娘進場交俾台前嘅 新郎，開席揀新人兩個自己行。如果由外父交新娘俾新郎，新郎會企在台前右邊(以面向台計)，伴郎可以企旁邊，律師企伴郎旁邊。進場 時新郎記得要面向門口企，同埋在新娘就到台前時主動行過去接新娘。新娘和外父就男左女右咁進場，伴娘可以跟在新娘後面。外父把新娘交到新郎手後，新郎同外父傾兩句先請佢就坐。d. 進場效果：灑花瓣，拉花炮，吹泡泡呢啲，小心紙碎卡在頭髮，清理唔到。留意場地有咩限制，例如唔可以用花炮真花瓣，紙碎要收清潔費e. 進場掌聲：進場時如果唔起音樂肅立，而係叫賓客鼓掌的話，好快就會變到好細聲。MC 要keep 住鼓勵大家繼續，同埋兄弟姊妹都要幫手做媒f. 新娘要慢慢行，唔好踩到裙，每下都可以踢一踢裙先踏出去(需要練習下，否則好唔自然)。職員應該會幫手整理好裙擺等你一隻手拎起少少裙，另一隻就勾住新郎/爸爸的手，再拎手球。
13. 證婚儀式起身坐低時要小心，唔好起身推開咗櫈又唔記得，直接就坐落去。
亦可以用high table 站立進行，可以多啲機會睇到靚衫。
亦可以用high table 站立進行，可以多啲機會睇到靚衫。
14. 證書
a. 證書套：可以在其中一面準備一張婚紗相，另一面放證書，影相會較美觀。b. 重要文件：儀式完成後，記得帶走同收好結婚證書。當然身分證都好重要，提埋證婚人帶。c. 簽結婚證書時記得望清楚位置先簽，同要簽返之前交嘅簽名
15. 證婚誓詞：
a. 誓詞卡/Vow book 同欄門花球一樣係出鏡好短暫的小物，不過我覺得有準備令整個畫面都靚好多。b. 可以叫另一半拎住誓詞卡俾你讀，咁就可以望住對方讀誓詞。或者可以律師一句你一句咁就唔需要誓詞卡。c. 比起張卡，內容更緊要，自己寫誓詞特別好多，感人好多。所以可以的話，證婚誓詞同愛的宣言盡量加幾句自己的心底話啦！d. 事先練習一下自己讀誓詞咁就知道有咩問題（聲線速度等等）。e. 證婚儀式可長可短，如果席前證婚想盡快完成，其實得一句係法律規定要有。f. 原來經典誓詞中「此生不渝」的「渝」係讀「如」！g. 新娘讀誓詞好大機會爆喊，所以要有兄弟姊妹拎定紙巾在台邊Standby。或者開始前新郎袋定幾張紙巾在西裝內袋，隨時兌現愛的宣言上面嗰句：妳喊幫妳遞紙巾
16. 結婚戒指：
a. 新郎先幫對方戴戒指，望清楚係女戒先拿起，否則為免中斷，要夾硬戴上。b. 要俾攝影師見到，不能捉住對方的手戴上，而是托住。需要圖示請參考：白米的婚禮工作坊分享c. 戒指放邊? 儀式前已經放於枱上戒指枕、由花仔花女進場時帶到台前交給律師、伴郎保管，在儀式進行時遞給新郎d. Big day 即使無需要都可以戴埋求婚戒指，曬下幸福鑽戒e. 記得之前試戴下 (婚後回顧 BigDay倒數3日備忘Tips - 加強版)
17. 證婚時間：和證婚地點息息相關，如果在婚姻註冊處/教堂，未必想幾點就幾點。
a. 如果證婚地點有別於晚宴地點，新人好多時都會安排埋大巴接送親友到晚宴地點(當然都要考慮人數和相距晚宴時間耐唔耐)。b. 想朝拍晚播有埋證婚儀式，問下攝影師cutoff 時間。我自己係因為咁要17:30開始證婚，一般18:00 cutoff。c. 席前證婚盡量簡短，完成儀式後先開席，把成長片段/致辭安排至較後時間。雖然席前證婚可以參與的人較多，但係一般比較嘈，大家唔太睇到台做咩又等開飯。d. 私下要同邀請出席證婚儀式的親戚朋友再講一次時間地點，就算帖有寫但係大部分人其實都唔會睇。
18. 拋花球：安排拋花球環節當然在露天場地比較好。證婚之後的時間係最Perfect。不過參與觀禮的人可能比較少，無咩人出黎接花球。留返夜啲在晚宴進行都係一個選擇，不過要小心樓底太矮會撞燈。同埋rundown要諗下點樣加插呢個項目先會流暢啲。建議考慮返你自己啲朋友係咪鐘意湊熱鬧的人先，香港人一般都好內斂，食緊飯要在咁多人面前接花球，好多時未必肯出黎。與其要拉人出黎充撐場面，造造作作咁拋俾內定的姊妹，不如skip咗佢。(其他拋花球Tips見Big day 注意事項 - 衣物花飾篇)
19. 結婚蛋糕：香港中西合璧婚禮有個好奇怪嘅地方，就係切兩次蛋糕，一次真一次假。多數證婚儀式後，會切個真蛋糕，順便分埋俾大家食。開席前切個幾層嘅假蛋糕影相。預備咗Cake topper，記得交代兄弟姊妹第一時間加返落蛋糕，好大機會準備咗而無用到嘅item。
沒有留言:
張貼留言