今次真係最後一篇Big day checklist 喇！寫完呢篇Checklist 控系列相信會寫上句號，我都轉咗去靚太Club。其實應該仲有過大禮和Big day利是Checklist，有興趣知多啲的b2b 就留意文末啦！黎個 Big day 前文回顧大集合先：
檔案名Tips：(見婚禮 Song list 懶人包)
當然仲要試咪，確保全部咪都夠大聲，場地最遠都要清楚聽到，同埋幾支咪的聲量要一致
21. 場地完成所有測試和綵排才開放給賓客進場。唔通要大家睇住你練歌，March in? 在同一個場地證地加擺酒，最好有個夠大又多座位的麻雀房／休息室，可以等親戚有個地方坐下。
22. DIY佈置需要的人手和時間：
話說酒店有簡單佈置，我本來打算叫兄弟姊妹再後補佈置就算。但是老公堅持由Deco公司搞，因為當日無人得閒。最後都好慶幸搵咗Deco公司，真係快靚正。Lunch banquet結束清場到證婚儀式之間時間不多，Deco公司安排咗5個師傅極速完成。強烈建議趕rundown的b2b搵Deco公司。我哋兄弟姊妹人數唔多，交場後又各有各忙，自己佈置真係會好大機會Delay。
事後回顧，係咪一定要搵Deco呢？當然唔係，都有唔少b2b分享過自己佈置的心得。需要DIY的b2b可以留意：
a. 時間（有幾多時間可以做佈置？平日的話多數可以提早交場。油畫架、簽到枱嗰類唔需要等清曬場先整無咁大時間壓力）b. 人手（有幾多兄弟姊妹可以幫手？9對同3對兄弟姊妹的分別已經好大。記得部分人要幫手其他準備：幫緊新娘換裙，泊車，接親戚朋友到場，拎蛋糕等等。除咗set場，仲要考慮清拆安排）c. 事前測試同俾sample相（睇下可否自己試整一次先，知道有幾難要幾耐同埋有無要特別注意位。盡量安排唔使再加工的佈置。）d. 準備Plan B（如果唔夠時間的安排，會唔會唔在台上證婚？）
23. 簽到枱佈置：準備Sample相(見兄弟姊妹會Briefing checklist)。DIY的話，兄弟姊妹要跟住整。Deco公司安排的話，他們亦要對下啱唔啱同放返啲私伙物品。
佈置物品事先分好邊啲一定要有，邊啲可以唔要，以防唔夠位放。
留意油畫要唔要講定擺法。(見JOJOKA的分享)
24. 格格不入座位表：座位表往往改到最後一刻，叫場地負責幫你印座位表。咁就預咗應該係一張Plain text的黑白打印A3(或者A4) 紙。不單止會同其他佈置唔夾，字又唔夠大。好似咁樣↓
完美主義者請自行安排，或者事先提供座位表template，到時幫你加返人名印。好似咁樣↓
如果即場印座位表，留意會唔會有賓客名字較特別的，電腦出唔到嗰隻字。
寫請帖嘅時候已經知道傳統中文抬頭係好難搞嘅一事。座位表都一樣，最好問埋座位表係咪都跟請帖寫，尤其是女士們嘅稱呼/稱謂：
a. 用佢自己名字(又分冠夫姓/唔冠夫姓)b. 用丈夫/先夫名義(即係XXX 夫人)c. 用一家人的名義(例如同埋仔女一齊)d. 用親戚關係(即係大姑姐四姨媽)
男士一律寫先生真係簡單好多！無辦法，傳統男尊女卑造成的困擾。我開初以為無所謂，原來真係有長輩好介意。
25. 派利是俾員工：可以事先問咗當晚有幾多員工，準備定。至於邊個派同點樣派，可以新郎自己派，叫新人父母派，叫兄弟姊妹派都得。我哋就一到場見到負責人，就問佢人數，一次過交曬俾佢分發。有人話阿頭會自己落格唔俾啲細，我覺得都唔諗得咁多，你逐個派完都唔知佢事後點處理，我信酒店staff 應該會好啲，無謂漏咗。
26. 錢銀的最終話事人：On day PIC大家都應該有，但係錢銀有關的事未必話到事，尤其是銀碼比較大的項目，交代低要點樣處理，例如要臨時決定加唔加酒水小食，開唔開多圍酒席之類，一定要問返新人兩個？定交俾父母？
27. 席前小食/結婚蛋糕：依家candy corner都好受歡迎，多數場地都唔會另外收錢，有啲直情送candy corner。但係如果鹹點就要收費，或者只可以同佢哋訂。
如果小朋友唔多，未必要有candy corner。大人可能寧願飲多兩杯酒／食小食多過糖果。Candy corner 要放響當眼位置，同埋唔好擺得太靚太整齊，大家唔會拎黎食。鹹點就要預備定要refill，因為可以食得好快。
結婚蛋糕多數都提早切，然後當Candy corner/席前小食派埋俾大家食。如果開席先切，都可以照分俾大家食，但係中式晚宴本身都好多餸，大家個肚應該無咩空間食。
28. Photo booth/即場派相/Selfie corner安排：Big day相起碼都兩三個月先收，有即場派相俾賓客都幾好。
我哋加錢叫Photog 派埋相。留意即場派相/ photobooth 時間限制點計法，我原本以為只係service hour 2個鐘，但係原來早過6點開始都要附加費。如果提早到7點開席就fit 唔到個rundown。
如果好想大部分人都影曬相，拎到即場派相，要有心理準備會遲cut 影相，遲換裙繼而遲開席，特別平日大家無咁早收工。可以事前提下大家早啲到黎影下相，唔係太遲影唔到就嘥曬。Vendor無限時當然就最好。仲有就係迎賓時段MC多啲叫賓客去影相，尤其是photo booth。即使新娘去咗換裙都可以叫大家繼續去photo booth影到佢收工。小心計下要join幾多張相的Package，有時一個人會同唔同group影，所以唔好預一人一張。
另外，我覺得即場派相唔可以咁遲派，最好敬酒之前派完，敬完酒開始有人會早走。如果自己印相就睇下可唔可以唔同group搵個代表派，其他就靠兄弟姊妹認下。
安排2nd backdrop/selfie corner/photobooth要留意場地夠唔夠位，同埋會唔會大排長龍，塞住Reception。
其實叫兄弟用即影即有幫賓客影都係唔錯的選擇。
其他photobooth 注意事項：揀Photo Booth勿貪平！落訂前必知8個Tips
29. 如果場地需要收麻雀枱轉返酒席，早啲Cutoff。賓客到場就會埋位就座，如果餐枱仲未準備好就會亂坐或者被迫行行企企。早啲收麻雀枱亦可以避免大家掛住打牌唔埋位開席。
我哋直情決定唔擺麻雀枱，但係少不免有人抱怨幾句。
30. 晚宴前補敬茶環節
晚宴難免要補敬茶。補敬茶可唔可以盡早完成／極速完成都係靠父母：
a. 叫親戚早啲黎飲茶，唔好臨開席前先到b. 父母幫手安排好邊啲人要飲茶，邊啲唔使，同埋先後次序c. 幫手集合埋啲親戚一次過上台飲茶，因為擺位都花時間d. 親戚可能之前已經俾低禮，事先寫好在金器／敬茶紙，當日帶埋去等親戚飲茶時親手俾新人。但係就睇下要唔要即時戴起，因為未必想迎賓衫配金器
31. 即使場地會安排職員follow新娘都留一兩個姊妹在台邊：
a. 要幫忙Keep起長輩敬茶時派的利是b. 賓客親手交俾新人的人情/禮物c. 新人在台邊走唔開，需要佢哋幫忙做傳聲筒，例如叫父母上台影相d. 幫手拎住賓客啲衫同袋，同用佢哋手機影相e. 補敬茶要幫手奉茶同保管金器
32. 親戚大合照最好迎賓時段影。迎賓影相敬茶和影家族大合照係較花時間的部分。同敬茶一樣，最好安排合照的親戚一次過上台，尤其是有人去打麻雀的話，好多時等到臨開席收枱先見返人影相。影超多人的大合照成日大家都唔肯坐，在台上你推我讓好耐，可以直接點名搵幾個人坐。有時父母想同親戚朋友影相未齊人，但係又要霸住個台等，MC要適時請父母暫時讓返個台出黎先同請其他賓客上台影相。
一般親戚會早少少到場，迎賓比較人少嘅時候可以同佢哋細group 啲影多啲相。敬完酒補影相要顧及其他賓客未必有咁多時間慢慢影。擺酒當然會俾親戚上台影相先，但係影太耐又怕其他人等到太夜都未走得／相都無影一張就趕住走。如果圍數多可能開席後，換衫前都要keep住同親戚賓客影相。
33. 記得要有影相List。俾MC的影相最好分得仔細啲，細group，大合照，例如新郎三姨一家、女家姓Ｘ的所有親戚，咁樣先方便MC 叫人同埋唔會漏。另外最好都有張影相Wish list 俾攝影師。呢個係我的小遺憾，諗住都唔會有咩miss咗，點知發現自己著婚紗無同老公兩個單獨合照過同婚紗條拖尾係無出現過。
34. 新人兩個要影多啲合照。承上，一有空檔就叫攝影師幫你哋兩個影多啲相！另外，有機會都叫每位兄弟姊妹同你哋合照下，佢哋好多時都行開行埋幫手，無機會影相。
35. 點先可以準時開席？首要條件係要個場有返７，８成滿。其次就係準時cut 迎賓影相，等新娘可以入去換裙（當然如果你唔使換就無問題）。我超強調要準時開席，左諗右諗其實都未必控制到，如果做到呢兩點應該都唔會太大問題。若然開席時間提早咗（即係唔係5時恭候，8時入席），記得要特別提醒出席的親戚朋友，否則大家只會當8點，到時人數太少都係要等夠人先開席。
36. 晚宴要慳時間，少啲換裙轉妝最實際。換裙轉妝每次起碼預留30分鐘。除戴金器最花時間，安排多啲時間要戴／除金器的換衫時段。（金器安排見衣物花飾篇）真係好趕時間，敬酒後可能無時間除金器，就一直戴到送客。
在無時間中擠時間的辦法：
a. 婚紗晚裝選拉鍊裙，快好多 (睇carriesogood的blog 學到嘢，雖然另一個原因係我想望落瘦啲)b. 選簡單自然的髮型。髮型因為鐘情鬢辮我點都要有，所以採取先縛後拆的安排，證婚同換敬酒裙多啲時間就紥辮仔，進場同送客趕時間就放返頭髮落黎；c. Set 頭用頭飾會快啲。鮮花Set 多數會耐啲，特別要整花環的話，但係當然真係靚啲；d. 每次換裙伴娘姊妹都先入去房舖定裙
37. 婚鞋其實睇唔到，著咩都無咩所謂，所以不妨換返平底/波鞋，等自己休息下。但係都要注意穿崩位：補敬茶要跪低（咁就要睇下條裙遮唔遮到），坐低睇朝拍晚播，敬酒時會走動，短婚紗／晚裝（呢個當然會睇到！）
38. 請酒店／酒樓把燈光調暗，令賓客準備開席：收細聲浪同返埋自己位坐。（睇IrisWaiWai的blog學到)
圍數多就可以搵兄弟帶位入座，人多／座位改動太亂就安排好賓客先，兄弟姊妹遲啲先入座。
39. 座位安排：自己唔擺酒都想象唔到安排座位係幾難，除咗個場太細唔夠位座，太大又meet唔到min charge呢啲前期問題，仲有就係永遠都唔會砌到12人一圍。當日總有人黎唔到，所以著量安排13位一圍。尤其是長輩比較傳統，派帖前無問人黎唔黎就照派，咁你預咗一定有吉位，可能仲會好多。但係至少主家席盡量坐滿。到當日，到底賓客坐得舒服，開開心心食飯緊要，定係唔好浪費酒席位緊要，就自己決定。不過坐低咗就唔好叫人再搬位，感覺真係唔好。
如果有賓客特別要一齊/唔可以一齊就建議加名牌在座位。
至於兄弟姊妹的座位，一齊坐方便gather，但係可能成日都會無人響張枱，同埋佢哋同返自己friend坐應該開心啲，各有利弊。
如果好似自助餐呢啲按人頭計，記得再點人數。
40. 自攜酒事先交待場地，所有樽都要keep低，搵兄弟開席前同散席後點數。如果啤酒、汽水、橙汁唔係free flow的，都同樣做法。
41. 事先傾好photog 同mua 等工作人員晚飯安排。係Crew meal /入席食？同埋唔同人可能可以食飯的時間唔一樣，要同職員講返分開上菜。我當日完全唔記得咗，都唔知mua有無食過飯，photog 就話佢哋中午食太飽唔使食。
42. 人情金器只可以指定人過手。Big day 最驚有失竊！人情開咗席就鎖返入保險箱，金器首飾唔用都鎖返入去。
43. 進場時，記得笑同慢慢行。查實熄曬燈係乜人都睇唔到，一邊行一邊笑同望下兩邊，行慢啲都無所謂，最緊要唔好跌親撞親。
44. 成長片段唔好太長。多數進場前播，齋睇相其實都幾悶，5分鐘已經好足夠。或者可以播其他片段代替，例如ＭＶ形式的開場片。巳剛剛去過一場婚宴，場地係可以在每圍投射同步播，超鐘意，咁就唔怕有人坐得遠睇唔到。若果趕時間開席，就進場開席先，之後先邊上菜邊播。
45. 開場講稿寫定貓紙，夜晚上到台真係一片空白，寫定少少野會安心啲。同埋小心唔記得改口仲叫uncle auntie。
講稿要提前寫 (見倒數3日備忘Tips) ，可以將開場說話事前錄片代替成長片段，唔怕唔記得或者太激動講不出聲。
父母如果會上台講幾句注意下時間。
46. 想早散席有咩方法？減少席間活動，例如表演、遊戲、驚喜環節。順帶一提，其實big day表演失準好常見，特別係新人自己表演，可能太緊張。另外，就係在菜單著手，放棄８個菜轉６個菜的菜單，同埋要叮囑場地上菜上快啲，一個接一個，唔好咁停菜位。自助餐形式應該可以好早散席的。
47. 注意酒量。如今婚宴都少一定捉住新人灌酒，不過新人事先食啲嘢打底安全啲，尤其是big day可能全日無咩食過嘢。如果你同我一樣，一飲酒就會超面紅就記得當晚要滴酒不沾，唔係影唔到相。
48. 有泊車飛/散席有大巴接送要早啲叫MC公布，搵個兄弟集中處理，大約敬酒前後時間，免得啲人走曬。因為我哋泊車位唔多，所以事先留泊車飛在Reception，簽到時派埋就唔怕認唔到。
49. 散席安排：諗定有無March out，有March out俾個signal 大家宴會結束都幾好。話說我哋完全無諗過有時間剩，影完大合照都未有人起身走（呢個時候我老公仲坐返埋位KO曬佢個份餸，呢個新郎會唔會太Over），猶疑咗好一陣要點end，要唔要MC黎個official ending。完曬自己個rundown 仲有空檔位真係覺得好厲害！題外話，有空檔其實應該把握機會埋枱同啲人傾下偈，全程都好少機會同賓客玩下。
好啦，其實大家多數overrun，要Plan定如果太遲，想唔想繼續係台影相，定出去送客。送客兄弟姊妹要唔要幫手？定早啲開始收拾清場？
50. 準備定多啲散紙（呢點係b2b share在酒樓遇到的）完曬婚宴，開席前派曬利是，散席後俾咗貼士，仲有一樣叫添喜，如果無細額鈔在身，就唯有俾大紙喇
Big day 水蛇春咁長的備忘寫完了！最後一篇賣大包給睇到最後的你，附加Big day 派利是和過大禮Checklist
Big Day 利是表
其實大同小異，我Mark 咗個Google Sheet，可以計下要幾多紙幣同利是封。唔Pm 啦，Link 在呢度：
過大禮物品
本來諗住簡簡單單最後都係好澎湃的過大禮，當日在房出黎見到咁多嘢都嚇一跳！
——————————————————
Check list 控系列
H+S Checklist控系列：Big day 微管理手冊-證婚晚宴篇(上)
選擇困難系列
H+S 選擇困難系列：大腳女生的紅鞋子
沒有留言:
張貼留言