水之二次方: 水水聯婚 --- Checklist控系列：遲來的租衫試衫準備手冊

點解完曬Big day 先寫試裙Checklist？因為本來無打算寫，自覺在租裙上失策咗，無咩精明貼士分享。但係反正都做咗功課，咁就整理下share埋俾大家，我呢個Checklist控系列又可以完整啲。呢篇文係極長篇，因為我將所有之前上網睇咗、試完裙的分享都寫曬入去，無再分幾次寫，大家自動分幾次睇算啦！

有時啲舖頭問一樣答一樣，唔問就唔講，真係好易出事。最後我去咗大約10間店舖試身，好彩無不快經歷，黑店呢樣野真係防不勝防。

大家可以先重溫esdlife舊文：

租婚紗注意事項

租裙褂注意事項

裙褂知識小百科

（不負責任的？）試裙須知

婚紗店須除鞋內進，不希望赤腳就記得著襪
自備nu bra束褲。雖然向婚紗店借，不過唔多衞生。但是無就遲啲先買，用無帶 bra試住先，定咗款先再買，因為可能有露背Deep V之類要配合返。
事先脫毛及打底。有心理準備職員要在試身室幫你換衫。一般會等你換好先入去綁繩/拉拉鍊，但亦有機會全程佢哋都陪住你換衫，為免尷尬都係先處理一下唔想見光的位置。
有好多Checklist無Mark但需要試身時留意下的地方，例如店主／職員態度，衞生，整潔度
試裙其實比想像中攰，如果試咗好多間都未有啱，不妨暫停一段時間再試。放心，一定會租到裙，唔好心急
試完裙可能會問屋企人，未來老公，或者姊妹，但講真好多時佢哋真心無興趣。呢個時候b2b group真係最強後盾，待嫁新娘先有呢份熱情，隨時候命幫你的專業評審。
事前望下淘寶/行下金都百利，睇下大陸裙係邊啲款，格下價，免得去到舖頭粉絲當魚翅。
大部分新娘都應該長頭髮，先紥起頭髮再試裙，尤其是試裙褂，因為朝早多數紥髻。另外就係如果冬天試褂就著件薄衫，同最好著短／中袖。然後就係大家都應該知，裙褂唔可以全套試。試西裝多數都要自備恤衫，原來普通返工恤衫同禮服恤衫係有分別架！未有的話，推薦去尖沙咀趙太(唔寫blog介紹勒，好多人寫過，可以參考Zaza呢篇或者fushigi呢篇) 都買，性價比超高，仲要服務好。唯一唔好就係人多。

試衫租衫Checklist

1. 開門時間，可以預約試身的日子時間

有一些店舖排期要排好耐，記得要早啲預約。亦要有心理準備，之後都好難約試裙，Final fit之類
如果想馬拉松式一日試好多間，要早啲預約先夾到時間，特別係星期六日
點解一日過試？
除咗方便一次過試曬同區慳時間，更大原因係即join 多數有優惠，咪一日試幾間比較下join 邊間。即日答覆都大機會hold 到即join 優惠價。所以試咗細機會租的舖頭，越覺得自己會join 就排越後試。(見amberwu的分享)
一日試3-4間就夠，再多啲會試到好攰，特別當遇到啲好hardsell 嘅舖頭，好容易就頭腦唔清醒做錯決定

2. 價錢：Rate card/Package 價錢

超多玩法。Package 即係最少都兩件，通常有分種類，例如婚紗+晚裝，婚禮+男禮。
Package永遠易加難減，就算要即join，都join 最平最少件數先(來自CaremenW 的分享)。大家多數好早就租咗裙，如果之後你會遇到更鐘意嘅裙都仲可以加，或者期間有咩唔對路要放棄都無咁傷。
有啲件數好多（9件10件甚至15件）的 Package，通常價錢好抵，可以慳唔少。事前最好計一計rundown係咪要咁多條裙，每次換裙最少預留30分鐘，唔可以車輪轉咁換衫。一係一早決定一家大細一個package租齊曬，一係租埋影Prewedding，否則都好難用曬咁多件。不過呢類package啲媽媽衫，男禮真係無咁靚。
留意Rate card 有無期限，租衫時fix咗日子，但係難保唔會改期延期。

3. 價錢：單租/後加的價錢

一般單租：婚紗/裙褂>晚裝>媽媽裙>男禮>姊妹裙
所以如果join package，一定要可以在呢間舖度搵到鐘意的婚紗先Join，因為之後婚紗Quota轉咗租其他裙係會蝕底啲。如果package無限款，就當然盡量選新娘裙。
裙褂則海鮮價，睇名也可以估到價錢點分，褂皇＞褂后＞大五福＞中五福＞小五福＞機繡褂／珠片褂，潮褂/秀禾服就另計。裙褂新舊程度亦會影響價錢，有時龍柱褂會略貴，有加水晶又略貴。
如果Package包埋租褂皇褂后，應該一定抵過出去單租裙褂，但要注意呎碼（見後）。
如果想租埋裙褂俾長輩／新郎又會著馬褂，去返傳統繡莊租啦，婚紗店多數都無。租咁多件就記得同褂店講下價。
通常一開始Join咗package，後加都會一樣價錢，呢個都係常見銷售手法，叫你join 咗先，hold個優惠價
單租多數唔抵，可能sample sale/二手買仲好，特別係海外Prewedding或者行禮。
中環，尖沙咀和觀塘都是婚紗舖的集中地（銅鑼灣，旺角和元朗亦不少），據聞價錢由低至高是：觀塘，尖沙咀，中環。不過個人認為地點方便自己／近出門和晚宴地點好重要（我係無車階層），所以完全放棄觀塘。

4. 衫的種類：裙褂、婚紗、晚裝、男禮、奶奶衫、長輩褂、姊妹裙

整體黎講當然款多較好。
話說我租裙時想換條新款婚紗，但係因為同原本租的敬酒裙似樣，敬酒裙又揀唔到第二條，所以幾經掙扎都無換。
注意返婚紗舖一般都有自己的風格，一條龍的婚紗舖或者無咁明顯。你唔會去主打日系的婚紗舖搵Vintage婚紗。
另外就係貨源同呎碼，就算間舖好多裙，都一樣只係可以得一兩條著得落，因為入黎入去都係差唔多碼。
小心舖頭淘寶裙當自己設計，同埋有啲舖頭表面上好多裙但是大部分都勁娘／勁舊款。
雖然話join最basic的package先，但係最好有Rundown，決定好自己要幾多條裙同咩款先，因為不同環節穿會有啲限制(見Big day 注意事項-衣物花飾篇)
留意旺季可能好多裙都借咗出街
有啲舖頭先睇相簿/Tab揀衫，然後先睇實物。有啲就直接拎條裙出黎。有相睇會好啲，否則要靠職員介紹，因為都唔知有咩裙款。唔使花太多時間睇相揀衫，因為好多都可能無期／唔響舖，可以逐round揀，無裙先再shortlist另一堆。
試衫通常職員都會問你想搵咩衫，收窄範圍。例如：
a. 按用途：外影，行禮，進場，迎賓，敬酒，送客
b. 按剪裁：平腳，拖尾，大拖尾，輕婚紗，大A line，細A line，魚尾，旗袍，傘裙，短裙
c. 按領口：背心，長袖，off shoulder，平領，心形領，企領／旗袍領，deep V
d. 按質料：紗，絹，布，lace，刺繡，閃紗，閃石
唔識分可以參考柑柑桔桔的教學　
心形胸加A line永遠係最易著。魚尾裙、近期大熱的長袖婚紗同旗袍我就覺得好難著。如果好似我咁身材唔多好，好易試下試下全部都揀曬呢種裙。咁咪好悶？可以試下類似魚尾的Trumpet款（柑柑桔桔的教學文有講）。有時舖頭都會叫呢啲魚尾裙，但係佢易著過魚尾好多（束褲可以幫手收埋肚腩）。又或者著Vintage款，加斗篷之類。
至於裙褂，主要靠舖頭姐姐拎俾你試，揀衫條件就係價錢，金線密度，新舊程度三者取平衡。除了呢3樣，仲可以咁揀：
a. 龍柱 VS 花柱 (龍柱適合比較高大的新娘)
b. 平腳 VS 蓮花腳 (有說平腳代表婚姻平順，所以大家都避開水波腳。其實褂店會叫蓮花腳，蓮花腳多數會好睇啲。有段小插曲分享下：話說嗰陣試褂有位新娘同舖頭姐姐講話平腳先好意頭，姐姐好老實又好直接咁話，呢啲都係隨得人講，一樣可以話蓮花腳連生貴子好意頭，有咩所謂。)
c. 吉祥圖案 (不同圖案有不同寓意，有興趣可以參考返裙褂知識小百科。不少新娘鍾情的金魚，我唔算好常見。有宗教信仰亦可以直接搵無龍鳳的褂。)
d. 金銀彩線分佈 (不一定越多金線越好，褂皇褂后會令人望落去腫脤啲同老氣啲。金線太多金器唔起眼，銀線太多會顯得面色蒼白，彩線多會靚啲，但係就無咁貴氣。金銀線多同新褂會比較硬身，無咁舒服。留意裙褂上下身密度係咪一致，好多時大五福或者更密的褂雖然係一套但係上身係密過下身好多。想著得瘦啲，可以揀潮褂／小五福，潮褂剪裁無咁闊袍大袖，小五福就多紅布少金線，無咁脹。)
e. 呎碼剪裁 (因為裙褂無得改，最多靠加珠同綁高啲裙頭遷就，每件其實有少少分別。脥位手袖位要啱位，否則會好唔舒服。我計過big day裙褂同迎賓裙應該係當日著得最多時間的，所以要著得舒服。)

5. 有沒有免費試身？限件數試？限時任試？試多過Free trial 件數/時間收費如何？

記得要問清楚試身收費詳情先好試，舖頭無提都要主動問清楚係咪免費先
試身多數第一次先可以免費，之後就要落訂join package先可以再試，否則就要另外收試身費。所以要善用quota。點計第一次間間計法唔同，可能到店就已經用咗，又可能齋睇唔試唔收費。
多數免費都係限試3件，其實真係唔夠。淨係新娘可能都租多過3條裙。試3件就要決定租唔租真係好易出事。一般如果揀咗條裙試唔到（太細件啦）會俾你揀過第二件試。好多時都會免費俾你試多一件半件 (當然俾係人情唔俾係道理)。
無限件數任試的舖頭就可以樣樣裙都試下，完全未有頭緒最好約一兩間任試嘅店舖揀下咩款適合自己。
大家多數會咁排次序：先係免費任試的店舖，之後到限件數免費試的店舖，最後先收費試的店舖。

6. 試身如何收費？如果租裙，可否在Package 價錢扣減返？

部分店舖不設免費試身。部分則只限首次限時限件數試。有啲就要like 咗facebook 先免費。最中伏係，試完唔 Join 要收返試身費，但係試之前無講。
另外不論店舖有無免費試身，Sample sale時幾乎全部會收試身費。
唔試都記得望下條裙實物點樣，睇相同實物差好遠，同時測試下會唔會好多裙無響舖。

7. 試裙後即Join 優惠（／其他婚展／限時優惠）？優惠期限計法？

有啲踏出門口就無咗，有啲同一日都可以，有啲可以酙情等到第二日，甚至幾日，睇你求情有幾叻。
優惠可以係租裙有折，租多幾條裙，可以無限轉款，free 試身費之類
折扣要注意係咪全單，附加費(e.g.拖尾)係咪一樣折。後加裙係咪一樣有折定只限即租嘅package，轉款補差價係咪都有折。免費租多條裙要睇下係咩款定任揀。折扣係只限package定單租都可以？
事先計下折扣實數多唔多，唔多就豪俾佢。折扣事小，撻訂事大。

8. 試裙可唔可以影相？

好多店舖都唔俾影或者俾左錢先影得，有啲就淨係可以影自己租嗰件。可以影相開心好多，因為試完其實都唔記得咩樣，同埋我多數自己一個去試裙，無相問唔到人拎意見。
若然唔俾影相嘗試叫職員用佢手機幫你影，一方面一定要望下係咪影相同現場睇都靚，另一方面如果決定響度租可以叫佢俾返相你，否則就算join咗都無試身相。
如果有朋友一齊去，其實可以叫佢哋幫手偷偷哋影一兩相 (有時真係想之後ref返)。
繡莊好多間都可以影相，但係有一兩間就出名唔得。

9. 試裙可以有幾多個朋友一齊？

即使無限人數，舖頭未必好大，避免太多人一齊去。
約埋婚期近的朋友去試係唔錯的選擇。

10. 婚紗晚裝有無分Grade？拖尾裙要唔要加錢？仲有咩附加費？

必問，免得揀好先俾人話要加錢，或者發現原來大部分想揀的裙都係要加錢
有時舖頭一開始就已經拎貴裙俾你試，如果話要試平價裙就即刻唔多想拎俾你，唔係借咗出去就係唔啱Size，咁就知道9成你都係只可以租貴價裙。平價裙可能狀態好差，只係做個樣／俾人去影pw搞到好殘。
拖尾婚紗，外國牌子，重釘工婚紗，新貨都可能會收貴啲。分grade 其實只有舖頭先定到點分，點先算大拖尾，點先算重釘工舖頭先知，所以要逐條問清楚。
之前提過繡莊裙褂差唔多件件唔同價，主要按新舊同金線密度定價。記得在收據寫返幾多手褂，安心啲。
男禮和媽媽裙一樣有機會分Grade收費，唔好怕煩問清楚。

11. 包邊啲Accessories?　租用安排如何？

一般每套裙免費包一套頸鍊耳環，婚紗就額外包頭紗。
免費包的items 例必問係咪全部任揀任搭，定係只係指定款，有無邊堆要加錢？有咩限制？例如兩套婚紗但係只可以選一個頭紗，或者加咗肩帶就唔可以加外套。
租裙有潮流，早幾年興配裙撐手套，依家興外套和一裙多著。無論外袖衫袖衫領肩帶拖尾頭紗腰帶耳環頸鍊都當配件類。如果要借裙撐，最好借多過一個。無穿耳的新娘要問下有無夾耳環揀。
配件幾時揀？要唔要Hold？如果同裙款一齊Hold，轉裙款係咪可以免費一齊轉？外套一類係咪會同條裙一樣免費改size。特別係幾著嘅婚紗晚裝點計
可以的話，試裙時睇下配件靚唔靚
男禮係唔係已包齊外套，背心，腰封，呔，西褲？留意男禮背心係全件定係半件掛頸款，掛頸款全程要連埋西裝著。
媽媽衫有無包披肩？邊種披肩？毛毛定係好薄好似絹嗰啲？多數都有跟條薄紗披肩（不過媽媽們又多數怕凍自備毛毛披肩／外套）

12. 裙分唔分Prewedding同big day? 會唔會唔可以著去外影?

拎去Pw的裙好易殘，一般會分開兩堆裙，咁hold裙後極速變殘的機會細啲。其中一個好多人share的不愉快經驗就係已hold的裙之後變到好殘，被迫換裙，但其時靚裙都被Hold。打算租裙影Prewedding的話，不妨問下價錢／時間會唔會有所分別。
若然舖頭所有裙都不分Prewedding和Big day就要望清楚婚紗夠唔夠白淨同乜釘珠有無甩，特別係裙腳。試裙的時候可能唔覺，但係之後真係會嫌棄佢唔夠新淨。
另外，如果衫無入袋就掛曬響舖，會容易變殘，都要特別留意夠唔夠新淨。
任試的舖頭衫折舊的機會都會大啲
好多新娘 big day有外影，注意多details釘花的裙舖頭未必容許室外穿，怕勾爛。

13. Hold 裙轉款定款嘅安排？有幾次可以轉？最遲幾時轉？

開始試裙先知有Hold裙，轉款，定款，final fit之類。Hold裙安排？多數係落訂hold裙。不過若然當初無得任試，多數會約多日試曬裙先Hold
可以Hold 幾條？多數package租幾條就hold幾條。應該最少有兩次轉款機會。要揀啲舖頭入面好多款你都鐘意的，如果得好少裙鐘意，任試任轉都無用，到時靚裙一早被人hold曬，其他又唔啱心水。如果轉款機會少，想轉新裙會比較難。留意有無人Share join咗就好難book時間試衫轉款。
轉衫Quota係逐條計定逐次計？會唔會預約咗試裙無轉款都計用咗？
轉衫定款有無限制？例如幾多個月前先可以試衫轉款或者big day1個月前一定要定款無得轉之類。到店試衫轉款可以試幾耐？係咪可以任試？　
幫你Hold咗嘅裙款同其他配件應該白紙黑字寫低，免得搞錯咗無得對。

14. Package可以轉租其他衫？男禮/姊妹裙定係只限新娘裙？

記得婚紗晚裝唔啱心水就唔好俾錢，有啲舖頭見你睇唔啱都仲用訂金可以租其他衫，甚至話要黎買內衣束褲sell人，真係伏味好重。轉其他衫款其實已經蝕咗（因為一般會平啲），最怕新娘裙已經唔啱，要轉其他都仲要加錢。

15. 訂金和尾數幾多？分別幾時要俾？接受咩付款方法？中間如果有改動（加衫，轉款之類）令到價錢有變，會怎樣處理？

落訂前問下訂金／尾數點計同點俾。多數攞衫時或final fit時比尾數。如果立刻Full pay，真係要衡量下間舖信唔信得過。我就自動放棄咗Full pay的舖頭。

16. Final fit 同改衫安排？幾時final fit？係咪免費改裙？有無限改嘅次數？改裙要幾耐？

留意裙款係未必改短改窄。特別留意裙長，過長除左易PK，仲極有機會踩爛裙邊。所以final fit記得換埋big day著的內衣(Girdle/nu bra/束褲)同埋鞋。
Final fit完改裙大約一星期(其實未必要咁耐，不過中間唔會再試衫)。拎衫當日記得再試一次。真係唔好彩唔啱都希望趕得切改好。(見BigDay倒數3日備忘Tips)
即使舖頭會改衫，呎碼都不應該和原本相差太遠，否則會破壞衫形。西裝、裙褂基本上唔可以改，所以要碼數齊備，唔啱就直接換另一個碼。之前講過婚紗舖租埋裙褂會抵啲，但係一般碼數較少。如果Hold衫之後唔fit要轉，比較困難，到時只可以俾錢趕做頭褂（造租），或者自己出去租過一件。順便一提要留意長輩對裙褂有無要求，例如一定要頭褂，唔可以著潮褂之類。
如果包免費改衫，記得寫落單。
Sample sales 除了試身要收費，改裙都可能收費，甚至可能加錢都無得改。買前要考慮埋改衫成本同需要的時間。自己搵人改衫多數會早多啲，所以要改緊少少，大部分新娘近big day 都會瘦咗。

17. 租衫期：3日2夜？計唔計鐘數？延期收費？遲交還罰款？

一般都3日2夜。小心計算方法，當日關門前歸還即可，還是計埋幾點？罰款亦可能以每日為單位
海外Prewedding/婚禮 3日2夜未必夠，問下加長租期收費係點。通常唔止加一日半日，買裙應該好啲。

18. 按金點計？支票/現金？無論幾多條裙都係一個數？要逐條計？條條裙唔同價錢？配件要唔要分開計，定已經包埋？

當初我以為俾租裙錢就得，事實係租衫全部都要俾按金，而且數目都唔細。有啲好明碼實價，有啲就話要睇下你最後揀咗邊條先講到俾你知。
多數收支票，無問題就原封不動還俾你，但部分舖頭要俾現金。

19. 其他優惠：化妝，花球

20. 改期取消

跟攝影化妝一樣，簽約前要問下如果因為任何原因而要改期，舖頭可以點安排，記得白紙黑字寫低。

21. 清潔費，破損收費：會否租衫就要收埋清潔費？還是只限未能清洗污跡？

清潔費同破損費都係易中伏嘅項目，通常條款都只係寫會收取清潔費/破損賠償，點收同收幾多任佢決定，唯有希望唔好遇到黑店。可以簽約前問下通常會點計(見amberwu的分享)
最好有封頂，至少有個預算，唔會無端端要俾巨額收費。

22. 整套衫買走的價錢？

要海外行禮或者會分開幾日搞的B2b可以比較下買走衫的價錢，可能會抵過租。

23. 幾時會有新裙？近期有無 Sample Sale？

新裙真係吸引好多，除咗唔會見慣見熟外，條裙新淨係會靚好多，尤其是婚紗。
其實多sample sale應該代表入新貨入得密，但係小心係平價貨，先可以密密換。
舖頭有sample sale當然sample sale 買裙係最平，但係真係好多人，又無得試。(當然亦有啲係有得預約同可以試身的Sample sale，邊啲就要等大家自己做功課) 基本上要等開門加閒閒地排幾粒鐘，不過去行Sample sale 都係視察下舖頭環境，裙款，職員態度等等的好方法。我呢個懶人最後都無去排過sample sale。(見Sample sale 注意事項 )

24. 有無提供裙套衣架？遺失罰款？