究竟兄弟姊妹會要幾時開？有咩要準備？有咩要同佢地講？
當然每對新人big day安排會唔同，兄弟姊妹的背景、性格同能力都唔同，點同佢哋安排係最好要你自己先知。不過，若然你未有頭緒的話，不妨跟住呢篇準備一下。其實有好多野都好濕碎，想個會精簡啲自己私下同相關負責人交代都可以。
為咩開兄弟姊妹會？
- 等佢哋互相認識下
- 請佢哋食飯多謝佢哋幫手
- 話佢哋知當日流程
- 俾佢哋知道當日分工
- 交收物資，例如：請帖、姊妹裙、兄弟呔、送俾兄弟姊妹的禮物
幾時開會? 開幾多次會?
開兄弟姊妹會的首要任務是夾日子，大家都知道約食飯唔容易，而且難度隨著你兄弟姊妹人數而提升。我自己只係開咗1次會，在big day前一星期。可能大家會疑惑係咪太遲，事實證明係無問題的！因為太早開會，Rundown 講完都仲會改，大家又會唔記得。但係留意返咁遲開會就淨係主力講rundown。我哋係開會前已經講咗俾大家知佢哋主要分工。有需要佢哋幫手的地方都要另外提早講好咗，例如要幫手買野拎野借野搵野之類，否則臨時臨急好難安排。
如果想俾大家提早認識，可以早一兩個月食一次飯，純粹互相介紹下，吹下水咁，然後臨big day先再食一次傾 Rundown。
而姊妹們就會開多至少1次會，因為要準備姊妹裙同傾遊戲。
開會地點?
主要係可以容納一大班人同方便傾野的地方。例如:
新居： 如果屋企夠地方又唔太偏遠的話係一個超好的選擇！唔怕要限時限刻又唔怕太嘈，想要紙筆電腦都有。若然係新居的話仲可以順便俾佢哋實地考察big day去你屋企的路線。
餐廳／酒樓： 若然平日的話，可能都係直接去餐廳／酒樓比較方便。中菜會比較好，因為西餐長枱較難傾野。留意好難避免有人遲到早走，所以最緊要揀無限時交枱的餐廳。另外就當然係唔好太嘈，同埋最好闊落少少，方便大家傾Rundown 時寫下野。
Party room/Cafe：都係好好的選擇，特別係如果人數比較多。不過有時Party room的位置未必咁就腳,同埋要自己安排食物，為求方便就可能未必請到大家食得好好。
開會前有咩要準備?
- 約日期
- 安排開會地點
- 每人印一份 Rundown
- 同攝影師、化妝師、場地、MC(如果唔係兄弟姊妹負責)開完會，定好大部分時間安排
- 安排好每人分工
兄弟姊妹分工
當日有咩重要角色呢?
- 伴娘: 保管新娘物品，同響新娘身邊Standby
- 伴郎: 保管新郎物品，同作為新郎跑腿
- Timekeeper/On day PIC
- MC
- 敬茶時幫忙奉茶收禮
- 保管金器、人情、利是、禮物等貴重物品: 最好指定一個人，免得唔見。呢項工作可能由家人或者親戚負責
- 司機
- 物流管理，即係搬運工
- 各Vendor聯絡人
- 管理錢銀，例如：找尾數，提新人派利是，臨時俾錢買野
- 音響燈光
- 自家攝影師：可以安排用自己相機影下花絮，當攝影師Backup又好，方便早啲有相俾親戚朋友又好。當然呢項optional
- 照顧雙方父母：如果有兄弟姊妹同父母較熟絡（例如係新人表兄弟姊妹），可以安排佢哋跟住父母
開會有咩要講?
1. 當日服飾
如果好似我big day前一星期先開會，就要事先夾好，否則唔夠時間準備。
姊妹裙多數都已經訂造好／一齊買好／一齊租好，但係要講埋鞋／披肩／袋有無要求，例如顏色，鞋踭幾高。可以提議姊妹帶多對波鞋／拖鞋／平底鞋替換。
提醒伴娘要準備一個跟身手袋，幫新娘keep起個人物品。可以問下大家多唔多私人物品同會唔會跟身，否則就準備一個大袋放曬兄弟姊妹的物品留在屋企／酒店／會場。
如果會提供服飾俾兄弟就約個時間一齊度身／買，否則就講下衫褲鞋襪要咩色／花紋。
兄弟呔、姊妹飾物、襟花、手花準備好都可以開會的時候俾埋大家，但係就要小心佢哋當日唔記得帶！
2. 講一次整日流程（準備好Hard copy 同 Softcopy)
理所當然要講一次，等大家有個概念同睇下有咩問題。可以印一份簡單流程俾大家，再俾個詳細版佢哋自己返去按返自己當日的分工慢慢睇。Share 埋softcopy 俾大家。Hard copy 會唔見同唔會帶住，Softcopy 有時會仲方便，反正準備Rundown 的時候都已經有Softcopy。當日兄弟姊妹都係主要靠Rundown做野，所以可以寫詳細少少，等佢哋到時自動波。如果兄弟姊妹當日有需要分頭行事的部分都特別提一提。
3. 需要 Highlight 的時間：
- 早上集合時間 (& 地點)
- 化妝師，攝影師到達和開始拍攝時間
- 到女家接新娘時間
- 花車到達及開車離開女家時間
- 出入門吉時 ＊＊＊非常重要：如果有出入門吉時，請確保所有人，兄弟姊妹，雙方家長，攝影師，司機等等，都清楚知道
- 證婚場地交場還場時間，證婚儀式時間，律師到場時間
- 晚宴場地交場時間，場地經理On day briefing 時間
- 開席時間
- 敬酒時間
- 各Vendors 開始計OT 鐘嘅時間
4. 各人聯絡資料
應該已經事先有齊同send左俾大家，如果未就開會當日填一填，share返俾大家。我加埋各人的分工，咁就唔怕大家唔記得大家做咩。
5. 各工作人員資料
當日新人應該大部分時間都聽唔到電話，所以我事先將所有相關工作人員的聮絡同工作資料都放曬響一張Excel share俾大家，包括：工作人員姓名，電話，開工的時間，有無尾數要俾，有無OT鐘同幾錢，車牌同行車路線，同埋分別留咗邊位兄弟姊妹的資料做聯絡人。我覺得呢個做法都好方便。
另外仲有就係當日重要地址，男家，女家，出門房號碼／預約編號，午飯酒樓地點加預約號碼，證婚地點，晚宴地點
6. 物資同貴重物品安排
如果準備好物資表就可以俾埋大家。安排物資是兄弟姊妹當日其中一個重要工作，特別要提的包括：
- 當日早上有無物資佢哋要帶黎
- 有無花材／西餅／蛋糕／糖果/回門豬/餐酒佢哋要當日負責去拎
- 有無需要有人提早去簽場
- 出門有無嫁妝箱(紅喼)要拎
- 新娘新郎同雙方家長會著邊幾套衫？有邊啲配襯頭飾首飾？幾時換？邊度換同埋負責幫手的兄弟姊妹
- 金器人情會邊個保管，會唔會係親戚？
- 尾數同Petty cash邊個keep
- 散場後需唔需幫手收拾同搬野走
7. 佈置安排
同佢哋講有邊啲佢哋要幫手佈置？需唔需要清理？要點樣佈置(最好有Sample 相)。如果搵咗公司佈置，要俾聯絡、佈置的工作項目兄弟姊妹double check。一般的items有：
- 出門房/屋企佈置
- 接新娘遊戲物品
- 花車
- 證婚場地
- Reception
- 相簿枱
- Candy corner
- Seating Plan
- Backdrop
- 每枱的回禮/枱花
8. 餐飲及交通安排
早餐：傾好集合後一齊食,定大家食完先過黎。如果會叫外賣，記得早啲，以防等太耐。或者可以穩陣啲自取，但係要安排邊個去買。一齊食早餐可以有啲buffer時間以防有人遲到
午餐：兄弟姊妹放Break自己食定新人安排好？新人要唔要在男家食午飯？要的話，兄弟姊妹係自己食定一齊在男家食？一齊出去食的話，可以叫佢哋先去攞位同叫餸（或者事先叫埋），慳啲時間。
晚餐：兄弟姊妹會一齊坐定分散坐？ 伴娘會唔會坐埋響主家席
交通：姊妹會唔會有人響女家過夜？其餘的姊妹會唔會安排夾份坐的士？有無兄弟負責駕車？要接送邊啲人？租Van的話，時間路線係點？泊車地點？需要搬運的物資可以跟邊架車？賓客的泊車安排係點同邊個負責？散席有無接送賓客的安排？
>>> 同埋要提提攝影師化妝師當日餐飲／交通安排 <<<
其他安排
呢部分多數係兄弟姊妹睇完rundown 會問的。
- 敬茶部分預留幾多時間？有幾人會飲茶？在女家？在男家？開席前補敬茶？敬茶會唔會準備紅紙杯？敬茶係咪全部都會跪？如果趕時間，會之後補敬茶還是Cut走其他行程？敬茶時收到的利是金器需唔需要Mark低送贈人同放返入相應的禮盒？敬茶時要唔要幫手講吉利說話？
- 出入門有無吉時？出入門方位？有哪些儀式？例如：敬茶，拜祖先，灑米，食滿堂飯，食湯圓，回門 有無禁忌？例如當日忌用黑白藍色
- 開門利是銀碼大概係幾多？遊戲有無邊部分一定要有？玩遊戲有無人會Video call俾新娘睇？(呢部分當然姊妹們知道就得)
- 兄弟姊妹係咪全部人一齊去男家？當日有無人要遲到早走？
- 當日有無外影？會去邊度影？
- 會唔會拋花球？內定邊個接？
- 當日有無人負責接送家長？幫媽媽們換裙？
- March in的形式 (證婚／開席)
- 有乜野片要播？幾時試？
- 有無安排打麻雀？幾多枱？幾時要收枱？
- 出入門、外影、 March in、 敬酒、 送客等環節有邊啲兄弟姊妹要出現
- 有無才藝表演？有無抽奬？有無玩遊戲？要唔要幫手派相？
- 影相名單
- MC 需唔需要雙語/三語講辭
- 開席前需唔需要按出席人數重編座位？開席前數人數？
- 收到的金器、人情、禮物點處理？分開男女家？親戚俾父母？朋友同事同學俾新人？
最後，做兄弟姊妹都係一份唔容易的工作，多啲體諒同多謝佢哋。準備Big day 的時候真係好忙同會有壓力，難免有時都有點解要煩埋兄弟姊妹啲野的諗法。不妨放鬆一下，當局者迷，講到尾Big day 係點都唔關佢哋事架，你哋同佢哋嘅交情先係佢哋覺得重要嘅！要Big day 萬事順利真係唔少得一班幫得手的兄弟姊妹，所以要珍惜佢哋呀！
－－－－－－－－－－－－－－－－－－－－－－－－－－－－－－－－－－－－－－－－－－
Check list 控系列
選擇困難系列
１２３文字錄
沒有留言:
張貼留言