倒數前1至3日
1. 請假
我的big day 在星期日而我倆星期六不用上班，本來沒有請假的打算，但係每每其他人問起都會建議請假。完婚後的我都會加入佢地的行列，建議各位b2b可以的話請一至兩天假。臨結婚前一兩星期真係好忙，太多濕碎野要處理，我當時仲有D病病地，所以好需要休息。加上新娘子係有好多美容項目，好似染髮gel甲等等，要留返最後一刻做，放假可以一次預約好，順便俾個機會自己Relax一下。另外就係無論你個task list有幾乾淨，總會有突如其來的task要做，例如我們被徵召返屋企幫手貼對聯囍字，又發現漏左俾Deco 尾數要去返舖頭交
2. Big day前一天清空Schedule
我big day前一日基本上都是忙物流，即係做苦力。一整天出出入入攰到散左，去不同地方拎物資已經好難夾時間。唔知點解往往在這一天忙到頭暈的日子，父母好鐘意幫你附加節目，其中最熱門一定係同親戚食飯，話你係咪都要食飯架啦，好快啫。響屋企食都還好，如果出街食我去得食飯唔通真係開曬飯先出現，食完碗飯就走？所以我好早就聲明當日係唔會有時間出席，事實上當晚都只係一個人超求其咁食個晚飯就繼續返去準備上頭。
3. 盡量減少Big day前一天的to-do list
盡早安排各種準備工作，例如不少酒樓/酒店會容許提前存放物資在場地，可以問問會否可以再早一至兩天。如果前一天有甚麼遺留或者採購物資，盡量請親友幫忙，不要動輒就自己飛撲去處理。有時間都留返俾自己休息下。
4. 自己去拎衫+記得試身
未必在同一間舖租齊衫的b2b可能分身乏術，但係最好都係親身去拎衫，唔好請親友幫手喇。佢地未必清楚細節、按金尾數、拎衫還衫時間、包埋的items有無少到唔同到，同埋未必記得check衫。另外就係自己去拎衫可以即場試多次，萬一真係唔啱都仲可以補救，唔好諗住final fit完就一定啱！我當日有自己去拎衫但係就唔記得左試多次，條裙緊到差D拉唔埋拉鍊！如果唔係mua出手救我都唔知點算 T_T (所以Mua 超抵讚！之後再寫文)
5. 最緊要敷Mask
Big day前一星期應該係我人生中最勤力敷mask的日子! 怕敏感/有紅印所以big day前一星期無再去美容院做facial，而係自己每日都敷兩次mask。Big day 前一日真係零空檔，夜晚上完頭執好野已經好夜，第二朝又超早起身化妝，所以呢個時候出動Sleeping mask真係最好!皮膚夠水份mua先可以化個靚妝架!
6. 唔好唔記得: 安排首飾金器人情的處理
婚宴多於五六日進行，千祈不要忽略銀行的營業時間。記得事先到保險箱取回當天需要佩戴的首飾。亦要諗下如果婚宴後還未可以用保險箱金器要暫放哪裏。
婚宴人情要存入銀行，櫃枱很大機會要收取手續費，而且可能適逢週末休息。所以大家多數會利用存錢機，可事先查看位置。不過注意每個戶口一般每天存錢上限10萬，圍數多/親友人情重手的話，要分開幾個戶口，記得袋定多兩張ATM卡。
7. 唔好唔記得: 利是
當日要派的利是記得有時間就封定，唔好等最後一兩日。如果有朋友在近期結婚，不妨問下有無剩餘的利是，封利是的時間都慳返（當然前提係用咩利是封無所謂）。俾兄弟姊妹和工作人員的利是銀碼一般會特別安排，如果想寫返少少說話俾佢地就記得提早入利是同寫定。最後一刻先入利是俾佢地的我係完全唔記得左寫><
8. 唔好唔記得: 幫媽媽準備卸妝用品
呢項因人而異，我自己兩邊的媽媽平日都無化妝，所以事前已經幫佢地準備左少量卸妝用品，同講解左當晚點樣卸妝洗頭會好D。
祝大家聖誕快樂！希望大家的Big day 都順順利利！
有機會再分享其他的Tips
－－－－－－－－－－－－－－－－－－－－－－－－－－－－－－－－－－－－－－－－－－
Check list 控系列
選擇困難系列
１２３文字錄
沒有留言:
張貼留言